La entruga yá tien años... ¿Qué importa más? ¿La fin o'l mediu? Hai xente que se(nos) define(definimos) "nacionalista" o "independentista", n'Asturies más bien poca d'estes dos clases, sobre manera de la segunda. Podría dicise que los que se definen como nacionalistes o como independentistes nun formen parte del asturianu mediu del que falé estos díes. Eso ta fora de cualaquier dulda. Sicasí, ¿Qué ye ser nacionalista o independentista na Asturies d'anguaño?

Y solliño bien lo de "l'Asturies d'anguaño". Lo de los fines y los medios ye como definir el PIB pela vía de la ufierta o la de la demanda, paécense muncho y a la fin acaben nel mesmu sitiu, pero'l cálculu de les operaciones ye estremáu y lo que ve la xente tamién. Si definimos al independentista polos fines, definímoslu como una persona que quier una "república asturiana llibre y soberana". Col estáu, l'exércitu, la moneda, la bandera, l'himnu, la seleición esportiva, el so pesu políticu específicu na UE, l'escañu na ONU... etcétera. El nacionalista polos fines diba ser mui asemeyáu, quedría una reconocencia oficial (nun estatutu, nuna constitución) del calter nacional d'asturies, unes seleiciones esportives que xugaren los partíos y en definitiva, unos cuantos fechos más simbólicos qu'otra cosa de la esistencia d'una nación.

Pa dambos, l'afitamientu de la idea "nación" o la creyación del "estáu asturianu" son el fin a llograr, y cualaquier otra política (llingüística, cultural, económica, eleutoral, militar, civil, sindical... etc) subordínase al oxetivu d'afitar esa idea o de facer esi estáu.

Otra manera, el nacionalista y l'independentista pela parte de los medios tien un fin mui estremáu: El fin d'esi nacionalista y esi independentista coincide colos fines que persigue'l conxuntu d'Asturies (los asturianos medios) que ye'l "bientar". Esti nacionalista-independentista, vería nel estáu asturianu namái qu'una ferramienta p'algamar esos fines, o nel desendolcu d'una política nacionalista veríala, non como un fin en sigo mesma, sinón como un mediu p'algamar los oxetivos que busquen los ciudadanos. Pa esti suxetu, la política llingüística ye un mediu de salvar un idioma y de dar drechos (non una manera de promover una llingua propia que mos individualiza y da drechu a ser estáu). La conceición paez asemeyada, igual hasta les polítiques a desendolcar tamién, y l'entendimientu igual pue ser mui grande... Pero hai una diferencia fundamental, qu'esti últimu modelu de nacionalismu-independentismu lléga-y más a la xente.

Nuna sociedá que nun 95% nun tien como fines políticos cimeros "Estáu asturianu, nación asturiana, soberanía asturiana" (fines que sí pue haber en cataluña, por exemplu) y les preocupaciones - les fines - son "Paru, vivienda, trabayu, sanidá, enseñu... diba ser conveniente qu'esi nacionalismu compartiere esos fines y adautare les sos polítiques a esos fines.

Faló na entrada anterior un anónimu de que l'asturianismu tien que crear una alternativa: Sí, una alternativa sí. Un camín alternativu, non una meta alternativa. L'asturianu mediu tien bien claro au quier llegar, pue ser daqué murnio que l'asturianu mediu nun tenga mayor preocupación que les perres, el banduyu y les vacaciones; nun digo que non, pero ye a eso a lo qu'hai qu'empobinar les actuaciones. L'asturianu mediu quier dir d'Uviéu a Xapón, y anguaño pue facer el trayeutu en coche col PP, n'autobús col PSOE, en barcu con IX... Fai falta poner l'avión, l'avión nacionalista, pero poner l'avión nun ye cambiar el destín.

L'asturianu mediu, nesi viaxe, nun va molestase porque esi avión que lu lleva al "trabayu, vivienda, familia", apare na parada de la oficialidá, na de les seleiciones autonómiques, o en cualaquier otra... Hasta-y va paecer prestoso asomar pela ventana y velo. Ye un home mui abiertu l'asturianu mediu... Pero eso pa él nun tienen que ser más qu'escales o adornos, él tien mui claro au quier dir... Pa nós ye importante, pa él non, y si queremos entendenos, si queremos los votos pal nuesu proyeutu, empara d'eso tendremos que facer daqué por esi ciudadanu mediu, nun podemos pretender que l'alternativa a lo que-y ufierten PP, PSOE, IX seya otru viaxe a otru llugar estremáu. L'asturianu mediu nun quier turismu cultural, quier sol y playa... El nuesu retu ye da-y el meyor sol, la meyor playa, y amás meté-y nel paquete dalguna visita cultural...

La llucha nacional asturiana nun ye escontra "l'estáu colonial", nun ye escontra España nin el pancastellanismu que ta asitiáu nesa ideoloxía, que ye portadora d'actitúes y valoers resgresivos. Ye una "guerra civil".

Güei lleí n'infoasturies (www.infoasturies.net) una noticia sobro'l país vecín, que dicíen que'l BNG aconceyó a 25.000 persons nuna manifestación pol estatutu de nación pa Galicia... Equí, frente a eses 25.000 (Ta bien, vamos rebaxar la cifra si vos apetez, dexámoslo en 15.000 ¿Ta bien?) Frente a eses 15.000 persones (o 6.500 n'equivalencia pa nós, porque Asturies tien daqué menos de la metá de población) lo más qu'aconceyamos pal día de la patria (o'l 25 de mayu, según gustos) debieron ser 100... y toi diendo mui perriba.

 Si en cataluña o'l País Vascu, el presidente nacional pue falar y fala en nome de los catalanes o de los vascos, ye porque tres d'esi presidente nacional hai una nación que "encumólu" ellí. Hai una nación que determina unes coses, y hai unes polítiques nacionales... Asturies nun ye una nación, ye una nacionalidá, ye una nación-cultural; pero fálta-y ser nación política, como sí son Euskadi y sobre manera Cataluña.

Los políticos catalanes preséntense en Madrid con unos pidimientos nacionales, que sofiten PSC, ERC, CiU ya ICV... y yá si queréis quitar a ICV o PSC d'esta llista,c osa que nun veo, porque son partíos qu'arrespuenden a intereses nacionales catalanes masque tean en coalción con otros del estáu, siguen siendo mayoría. Los catalanes conformáronse como nación política dende la II República, reafírmense como nación política eleición tres d'eleición y pel momentu ye eso lo que tresmiten y pueden culpar a España de tolos sos males...

 "Los catalanes enteros diximos A, si ye B, la culpa ye d'España"

 Daqué asemeyao, anque non d'una cohexón tan grande como la catalana ye lo qu'asocede nel País Vascu, que ye una nación política anque nun tea tan bien integrada como la catalana. Galicia, ta camín d'eso y ta nun puntu mediu... pero nós non.

Por exemplu, si un catalán nun tien un modelu de financiación propiu, ye porque-y lo torguen en Madrid, si nós nun tenemos la oficialidá ye porque'l nuesu pueblo tórganoslo nes urnes. Bien ye verdá que podemos almitir munchu "enemigu", "españolón" y tolo que queriáis nesi 80-90% que vota PP-PSOE, pero nun vais ñegame que l'asturianu mediu, esi que nun 56% de los casos unvía a los guah.es a asturianu, que fala amestáu y que vive en xixón o una villa de tamañu mediu, vota a esos partíos... 

L'asturianu mediu ye la nación, escaecer eso pue llevanos a escenarios de política-ficción y a querer culpar al españolismu de los nuesos males. Cataluña, de votar agora, nun votaba la CE, Euskadi nun la votó, pero Asturies votaríala una y mil veces... Esi ye'l problema, ye por eso que l'asturianismu fracasa, porque pretende ufiertar un proyeutu qu'estrémase en mui poco del proyeutu qu'ufierten los nacionalistes gallegos, catalanes y vascos.

La mayoría de los blogueros, tamos d'alcuerdo con esi proyeutu, la mayoría de los blogueros quixeremos ver d'Asturies una GAlicia "a l'asturiana" una cataluña "a l'asturiana" o un País Vascu "a l'asturiana"... Pero l'asturianu mediu non, y ye'l sector mayoritariu de la población.

Nel sieglu XX había notables, y nobles, pero lo que más había yera xente normal, xente obrero o xente trabayador... con riegles democrátiques y tresparentes, imposible yera qu'esos partíos de notables ganaren unes eleiciones o foren quien a condicionar unes eleiciones. O ceden un pocoñín y averen los intereses d'ellos a los de la xente, y entós deveníen en partíos conservadores, o queden arrequexaos al 2-5%. Al nacionalismu asturianu pása-y lo mesmo, tán faciéndose polítiques pa esi 2-3-4-5% de la población, esi 2-5% de la población que diz qu'asturies ye una nación... Tamos viviendo al marxe del 95% de la sociedá asturiana, tamos intentando facer un proyeutu que, nel meyor de los casos, diba ser hexemónicu nel 2-5% de la sociedá (y nun lo ye, Andeches, FAI's, UNA, PAS y demás encárguense d'ello)...

A min convénceme'l proyeutu d'UNA. Lleo'l programa y decátome de qu'esi programa ye'l que quiero p'Asturies... El problema ye que l'asturianu mediu non.

¿Quién ye esi asturianu mediu? Un desconocíu pa nós. Y ye a él a quien hemos convencer de que tenemos la razón y hemos "llevar al güertu" pa ganar unes eleiciones o siquiera sacar representación. Vais decatavos de lo estremáu que ye l'asturianu mediu de vós mesmos...

 L'asturianu mediu nun vio na vida la wikipedia asturiana, l'asturianu mediu nunca nun entró n'asturies.com, nin n'asturnews... menos tovía n'infoasturies.net o glayíu... A lo muncho de Les Noticies debe saber qu'esiste, pero na vida pensó en mercalu. L'asturianu mediu nun llee n'asturianu, tolo más tien un llibru n'asturianu per casa, al Asturianu mediu présta-y pola vida ver un partíu de fútbol de la seleición española, nun piensa qu'heba peligru de qu'España tea frañando, nin piensa qu'Asturies ta desaniciándose, lleva la bandera, bebe sidra, escancia bien, pero nun fala asturianu... Nun escucha a Nuberu, nin a Esther Fonseca, nin a Corquiéu, muncho menos a Dixebra... présta-y más Victor Manuel, Melendi y pásalo de muerte viendo una carrera de Fernando Alonso.

L'asturianu mediu nunca nun foi a una manifestación pola oficialidá, anque nun-y presta que l'asturianu desapaeza... (y esta ente toles preocupaciones, nun ta nunca ente les 5 primeres). En verdá sacantes les de la guerra d'iraq tien dío a bien poques manifestaciones. L'asturianu mediu manda a los guah.es a llingua asturiana, pero depués nun-yos merca llibros n'asturianu nin fai nada porque deprendan nada fora de lo que ye l'asignatura. Esmoléce-y el paru, la economía, les infraestructures, la sanidá y l'enseñu...

L'asturianu mediu siempre ganará les eleiciones, porque por cada asturianista como tu o como yo, hai delles decenes d'Asturianos medios. ¿Qué futuru tien un proyeutu que fai de la nación la so bandera cuando l'asturianu mediu ye asina? 

Nesti enllaz, si sabéis catalán podéis ver una iniciativa mui prestosa pa la defensa d'una llingua minoritaria como la nuestra.

Esta idea tan prestosa, desplicándola mui brevemente consiste nesto:

Una persona comprométese a falá-y en catalán a otra persona que ta deprendiéndolo y que quier que-y falen en catalán una hora selmanal.

El voluntariu gana l'avezase a nun cambiar de llingua cuando-y falen en castellán, y l'otru pue prauticar poco a poco'l so catalán.

 Coses como esta, paecen pequeñes, pero son les que salven un idioma (amás d'otres munches, claro). Dicen que creáronse  14.418 pareyes llingüístiques (voluntariu/alumnu) y axuntáronse más de 300 entidaes al programa. Taría guapo facer daqué n'Asturies.

El militante d'UNA cuando-y entruga un foriatu per una cai...

El votante del PAS cuando fala cola dependienta del corte inglés...

L'académicu/a de l'ALLA cuando nun ta lleendo...

El manifestante de la oficialidá al día siguiente d'acabar la mani...

L'escritor de llibros n'asturianu cuando va al médicu...

L'estudiante-militante radicalón de Darréu o EMIR o FAI nel institutu...

Los universitarios asturianistes col profesor...

El que taba pola oficialidá y fala asturianu davezu al so propiu fíu pequeñu de trés años...

El periodista de Les Noticies con un estrañu...

Los que falen de poner bombes, matar españoles, quemar la bandera rojigualda cola xente del colexu o los compañeros de trabayu...

PA TENER CREDIBILIDÁ COLOS DEMÁS, HEMOS TENELA CON NÓS MESMOS... LA MEYOR NORMALIACIÓN YE LA QU'ÚN FAI...

Nun faigo esti artículu pa encamentar a naide que taría guapo que la xente fixere artículos na wiki asturiana... Bien ye verdá que taría bien, y bien que ye verdá qu'esto aidaría muncho al asturianu y a la comunidá de falantes.

Quiero centrame notra cosa: Na importancia de la wikipedia como ferramienta pa difundir o esparder idees y conocimientos. La rede, sabémoslo too, ye un instrumentu mui importante pa que los movimientos sociales faigan llegar les sos vindicaciones ya idees... al marxe de los calces oficiales y de pagu. AL marxe de nes televisiones (onde nun se fala del asturianu nada), al marxe de los llibros de testu (onde se cuenten mentires nos más d'ellos), ¿Cuál ye l'instrumentu al que recurre la xente cuando precisa d'información?: La wikipedia. 

La wikipedia ye un arma, una páxina del asturianu poniendo que ye un dialeutu del gallegu, si se dexa asina bien d'años, fadría por esparder ente la xente esa creyencia; asina ye y asina va ser la dinámica de la wikipedia. Poro, encamiéntovos que nes wikipedies de les llingües que conozáis, y sobremanera na wikipedia española, teáis sollertes a ataques o camudamientos nocivos pal asturianu nestes páxines que puedan llevar a la xente a una enquivocación sobre lo que ye en verdá l'asturianu.

Delles wikis, tovía falen de la llingua "llionesa", la "mirandesa", la "cántabra", l'asturiana etc, etc... como si foren munches llingües... Deberíemos igualo, y defendelo, porque eos nun ye dir un día y camudalo, ye evitar que mos lo cambien, ye tar sollertes y tenelo vixilao... Nel movimientu social, pa esparder idees sobre l'asturianu, el movimientu pola oficialidá, la lliteratura nuestra, asturies... Hai munchos calces, pero ún de los más importantes ye esti, sobre manera nes nueves xeneraciones, nun hai que lu dexar de llau...

Nun ye qu'IX lo tea faciendo mal colo del estatutu, home, igual podía falar un poco más y denunciar cómo n'Asturies tán vulnerándose los drechos humanos... pero van votar a la escontra y ellos fixeron lo posible nesta llexislatura (non na otra) pola oficialidá dende la oposición...

Si abro esta entrada col títulu de "nin un votu más a IU" nun ye porque considere qu'heba que castigar a IX, sinón porque considero, como consideren munches persones y vien diciendo'l Xanu bien de tiempu, que fai falta una candidatura asturiana que respuenda a Asturies y que seya vista como "Asturiana".

Anguaño, IX tien munchos votos d'asturianistes, que, pel momentu, nun se materializaron en nengún progresu (nun toi diciendo que votar a esta candidatura asturiana vaiga cambiar les coses...); lo que digo, ye qu'esos votos a IX de xente asturianista (Como Xuan Bello y demás xente de Les Noticies que públicamente sofitaron esa candidatura) ficiéronlo pensando en que puxaben pol asturianu (y en ciertu mou ye verdá, porque IX asume les tesis llingüístiques que toos compartimos), pero'l mensax que se ta tresmitiendo ye otru: El votu a IX, entemezse col de xente que ye "mui d'esquierdes" y que fai un votu puramente ideolóxicu esquierdes-dreches... IX tien 4 diputaos, y anque ún d'ellos correspuénda-y por drechu y cantidá de votos al asturianismu, la xente (nin políticos, nin sociedá nin nós mesmos, la verdá), percibimos n'IX esi componente asturianista...

LO que digo ye que, votando a una candidatura asturiana, anque-y quitemos un escañu a IX pa dá-ylu a esta formación, taríemos tresmitiendo'l mensax de que la sociedá demanda un meyor tratu p'Asturies... Estes candidatures asturianes enxamás van a presidir el principáu, pero van facer una cosa mui importante: tresmitir esi mensaxe a los partíos mayoritarios, que van querer pañar votos asturianistes... y eso namái que lo van facer si'l votu asturianista ye significativu ¿Cómo facer que lo seya? Metiendo una candidatura asturianista nel parllamentu. Esto ye daqué que furrula nos otros países d'España: En galicia la presencia d'un BNG que ye un nacionalismu d'esquierdes pero también de dreches, fai que partíos como'l PP o'l PSOE empleguen davezu'l gallegu... En Cataluña nun hai más que ver cómo va'l PSC por mor del clima nacionalista...

Los partíos adáutense a les sociedaes, yo nun veo al PP o al PSOE como l'enemigu políticu, véolos como parte del estáu español, son una estructura del estáu español (y tienen d'enemigu lo que l'estáu español), cumplen funciones de gobiernu y son "partíos-que-busquen-gobernar", non defender una ideoloxía, sinón gobernar, y que son (o habríen ser) porosos a les demandes de la sociedá... Equí una demanda política bien podía ser la oficialidá, o bien podía ser mayor autogobiernu, faciendo una candidatura qu'entrare nel parllamentu, entós, esos partíos, con un resultáu por exemplu: PP 21, PSOE 19, IU 3, Candidatura Asturiana 2 (nel qu'esa candidatura nun sedría llave) diba llevar a PP-PSOE a buscar la manera d'atrayer al so partíu los votos que dieron esos 2 diputaos, porque de nun facelo, esos dos diputaos siguen ehí...

Yo nun sé si esa candidatura asturianista ye'l PAS-URAS o ye la UNA, prestaríame que fore otra cosa bien estremada, pero la eleición ente eses dos téngola clara... Lo que ta claro, ye que nes próximes eleiciones hai que votar en clave asturiana pa mandar un mensaxe unívocu...

Nos últimos díes lleí na prensa delles noticies que falaben sobro la esistencia d'enmiendes pola oficialidá nel congresu de la FSA... Dellos dicíen que yeren militantes de les agrupaciones d'Uviéu, Xixón, Nava... etc... otros dicíen que yeren les agrupaciones d'Uviéu, Xixón, Nava...

Esto ye una cosa onde nótase'l mal periodismu al que tamos avezaos... dícennos el qué pero non el quién... El fechu ta ehí y ta claro: la enmienda; pero l'autor nun lo ta, y vais perdoname que diga, que nun ye lo mesmo que Pepín Pérez, ún de los 40 delegaos qu'unvía l'agrupación socialista d'Uviéu, presenta una enmienda... a que l'Agrupación d'Uviéu vote y alcuerde qu'esos 40 delegaos van defender esa moción...

Mesmo colo de Xixón etc, etc... A la fin nun va salir alantre nenguna, porque l'aparatu del partíu ye asina, xente vieyo y acomplexao que lleva los mecanismos del poder y fai el congresu a la so midida (o ye qu'hai candidatu alternativu?). De toes maneres, nun diba ser lo mesmo qu'un delegáu de Xixón, otru d'Uviéu y otru de Nava pidieren la oficialidá a que lo pidieren toos o los más d'ellos de les trés agrupaciones (y les otres que nun m'alcuerdo agora).

Cada día toi más convencíu de qu'esto de l'asturianu ye una cosa xeneracional... díxome un día un amigu de clase, que ye d'IX, que lo que-y más fadia del PSOE ye que-y da pel culu a IX y los d'IX faen un programa pa que'l PSOE lu copie a los 10-20 años... Paezme que colo de la oficialidá va pasar un poco igual... IX ta cola oficialidá dende 1996, paezme, pos nada, a esperar otros 10 añinos... L'asturianu amenorgará en falantes, pero bono, en tantu que sigamos cola llucha como mui bien encamentó l'ALLA nel so conceyu d'ayeru, la cosa va salir. Perdonái l'optimismu y llamáime tontu si queréis pero esto toi convencíu de que ye custión de tiempu... ¿¿Llevamos 30 años??

Sí, caro que llevamos 30 años, pero mándanos xente que ñació na dómina de Franco, que vivió la transición... Esperái a que mos manden socialistes que medraron en colexos onde la metá la clase estudiaba asturianu y la otra non, onde l'estudiar asturianu víase como dalgo normal (con independencia de qu'ún lu estudiare o non)... Hai 20.000 guah.es estudiando asturianu agora, cada añu más de la metá de los escolinos d'asturies estudia esta llingua... ¿Aprenderánla? Igual non mui bien, ¿falaránla? Igual mui precariamente... pero si pa dalgo-yos valió aquello, foi pa que la consideraren d'otra manera, y los compañeros que diben a "Cultura Asturiana" veríenlo como dalgo normal ell que los otros foren a asturianu y veríenlo como dalgo normal...

A la fin, la hestoria va poner a cadún nel so sitiu, yva vese que lo de "Bable nes escueles" foi'l mayor aciertu de tola transición...

Déxovos esti enllaz, gústame la reflexón.

http://www.lavozdeasturias.es/noticias/noticia.asp?pkid=432220

L'ALLA va convocar una asamblea, y véolo bien. Ye una asamblea na que van tratase tolo que cinca al tema de la llingua, pero l'ALLA nun va (nin pue)impulsar una de les soluciones que se faen más necesaries agora: La vía política.

L'ALLA ye una institución apolítica, y ha siguir siéndolo (y esperemos que lo siga siendo) y namái que tien que mirar pol idioma... sicasí, faise preciso facer daqué, un proyeutu políticu, que nun pue salir de negociaciones ente paisanos vieyos y con canes y caciquinos d'andar per casa que remanen nel so corripiu-partíu a voluntá... Faise necesariu entamar un CONGRESU POR ASTURIES. Una "New Politic", un actu fundacional, abiertu a tolos sensibles col idioma y l'autonomía, col idioma y la democracia y colos drechos civiles...

Faise preciso un 4u partíu, porque la non-politización de la llucha, porque'l llobismu llevó a que PP y PSOE ventilen nuna tarde, en 4 hores l'artículu 4... Nun podemos permitilo, nun podemos dexalo pa prau, y nun mos queda otra qu'entamar la vía política: Una vía política seria, una vía política que tresforme asturies, dende la tresversalidá propia d'un movimientu social, pero creando un partíu pal movimientu social. Tenemos que ser al asturianu y la oficialidá lo que foi daquella IU a la OTAN, tenemos que ser facer "EL PARTÍU", l'únicu, aquel que con dicir "el partíu" toos saben de quién falamos, un partíu abiertu, con sensibilidaes, con ideoloxíes diverses, como un BNG como una asociación abierta a la drecha y a la esquierda, axuntada na xera de facer d'Asturies un país meyor, de da-y drechos a la so xente, a la so llingua... quiciabes de separtase n'algamándolo, quiciabes de separtase más sero... Pero hai que lu facer.

Quiero, queremos munchos, un partíu nuevu, pero non un partíu más. Nun pue ser un partíu más, tien que ser otra cosa, tien que tar nél tol mundu, tien que se meter nél tolos partíos, un CAO políticu, un partíu de partíos, la Coalición d'Asturies, el FRENTE ASTURIANU... Ye esti'l camín, ye esto lo que necesitamos, y pa facelu, o namás que pa falar, que nunca ta de más ente xente que trabayamos no mesmo, faise preciso facer un gran conceyu, una gran asamblea o congresu fundacional abiertu a toos....

Esperemos que l'asamblea de l'ALLA valga pa que la xente vaiga a por una segunda asamblea, l'asamblea de la política, la hora d'acabar con esta comunidá autónoma enllamuergada y trabayar pola Asturies que queremos los asturianos que nin ye estáu nin ye república (otra cosa lo individual de cadún)... pero tampoco ye provincia nin la puxarra que mos quieren dar...

Tenemos que ser a esti estatutu lo que foi Luther King a les lleis raciales. Tenemos que ser a esti país lo que Ghandi a India, tenemos que ser a esta llingua lo que'l rock a la música. Tenemos que facer camín, y el camín tien que ser anchu, llargu, que nél podamos tar toos, que nél nun quiera sobresalir nengún, porque pa xugar a la política, pa tener poder, pa remanar al gustu d'ún, pa sentase nel escañu y pa lluchar con arte pol protagonismu y la sonadía yá habrá tiempu depués...

Agora nun hai tiempu pa xugar a la política, hai tiempu pa baltar con ella, pa mandar al infiernu la vieya política qu'amataga a esti país y pa facer la nueva Asturies pola que naguamos... Esperemos que se faiga... porque de nun facese bien poco podremos esperar.

Taba yo pensando, que pa lo que cambió l'artículu 4, si se fai referendum (cosa duldosa), a naide-y va dar por votar al favor, sobre manera viendo que nun hai requexu pal posibilismu...

A ver si faen un referendum y metemos esa puxarra que quieren colanos dende la Xunta Xeneral na papelera......

Pero ente que lu faen y non, ocurrióseme una posibilidá de protestar, que diba ser facer una quedada grande con fueyes del estatutu y prensa y la de dios y prende-yos fueu (Esto nun tien la cara de so maxestá, nun ye delitu).... Mexar enriba d'elles, rompeles, quemales... lo que se vos ocurra, la verdá que si s'organiza diba ser bona idea...

Na cai, nel parque, nel trabayu: ¡¡Quema l'estatutu!!

En viendo lo qu'asocede col artículu 4... yá nun sé si  ye meyor esta redaición o l'anterior, que cambia Bable por Asturianu, pero que pon al asturianu y al gallego-asturianu (una, llingua, la otra fala de transición y/o dialeutu del gallegu, va en gustos) al empar...

Nun sé, pero digo lo mesmo que dixi primero: a grandes daños, grandes respuestes, exemplares y drástiques... Con Gotor valieron (o eso pensamos) con Areces tendríen que valer igual... ¿Habrá más encierros?

L'embaxador marcha mañana de viaxe al Reinu Xuníu de la Gran... a visitar Oxford, Canterbury y Cardiff (otru país celta más) arriendes de London (que yá va ser la mio tercera o cuarta visita ende).

Nestos díes igual ta pesllau'l blogue o igual non, según la conexón. Si hubiera manera de coneutame, fadré por apurrivos daqué de lo qu'hai ellí nesta páxina, sinón, nunos díes nun voi echar la llingua a pacer.

Toi acabante venir d'un conciertu de Dixebra n'Alcorcón xunto con otros grupos... Ún yera un grupu catalán que se llamaba "La gossa sorda" y nun tocaba mal y los otros, a lo menos de los qu'oyí (he reconocer que pasé de sentir a munchos grupos llocales) yeren d'estos qu'a min nun me presten gota, nun sé si'l nome ye "hardcore" o daqué asemeyao... D'estos que dan berríes y tal... Sabéis de qué falo.

Pena foi que Dixebra quedaren pa lo último y pena foi tamién gastar eses perres (9€) y esi tiempu de mio vida en dir ellí... Ye verdá que nos últimos meses hai un cambeu en dixebra, que lleven nun sé si son 2 ó 3 discos ensin falar d'Asturies (creyo que foi dende'l de "sube la marea") y eso nótase y nótase muncho más cuando salen fora... y ye que cada vegada que siento "rompi'l ritmu", "el vieyu combatiente", "el cañicón" veo más claro que'l mio grupu de rock favoritu ye Skama la Rede... Pero ye sentir "Da-yos caña" (menos mal que ta grabada, que paez igual que'l cantar al caudillo de Victor Manuel, porque yá nun la canten nunca), "Rapaza nacionaliega" (por suerte esta sí), "Grie-ska", "Dime cómo ye" y delles otres y vuelven paeceme los amos del prau...

La verdá, gústame'l proyeutu nuevu de Xune de Clashturies, que busca nuevos soníos, lletres y temes, comprometíos pero d'otra manera... Sicasí, gústame la vieya dixebra, la dixebra combatiba, que na pallabra inter-nacionalista quedábase más colo segundo que colo primero, que yera más radical, falaba más del mio país... Quixi sentime cerca del país güei n'Alcorcón y la sensación ye agridulce, la metá gustóme la otra non. Nun sé qué sedrá, si los nuevos lletristes, o les nueves idees... (Cuido que nun ye culpa de los lletristes, porque agora abriendo'l folletu d'Ensin Novedá vi q les poques q me gusten son de dixebra y de los lletristes, y les que nun me presten tamién tienen les culpes repartíes...

Esto nun dexa de ser una opinión d'una persona que ye minoría (por ser nacionalista y por ser asturianu) y les minoríes contamos menos, pero tal paez que los grupos minoritarios sonlo cada vuelta menos y que lo que buscábemos en dixebra entamamos a nun velo ende y a velo notros grupos que vienen detrás con fuercia (toi pensando n'Escama la Rede)... Dixebra foi'l cronista d'una llucha nacional, la llucha nacional asturiana...

Güei esa llucha nun tien cronista y tal paez que ta abocada al final.

Fálase muncho siempres d'escritores, de pensadores, de periodistes, d'académicos, de músicos de manifestantes que mueven el royu de la llingua y davezu escaecemos a otros colalboradores qu'anque son menos numbéricamente tienen la so importancia y prevóquennos una sorrisa cuando bien poques razones hai pa sorrir.

 Ún ye Neto, l'archiconocíu collaborador de La Nueva y de Les Noticies, y l'otru Alberto Vázquez, qu'escribe-pinta más pa xente del royu. Quixi apurrir xunta esti mensaxe una semeya d'una de les tires que más me prestó (nun ye que nun les heba meyores, que les hai, namás que féxome gracia y alcordéme del nome del puticlú de Llanes, el Hollywood, pel que pasaron dellos collacios de clas - o dixeron tener pasao- )

Nun sé por qué nun se considera'l cómic como otra disciplina más de les artes al mesmu altor que la pintura, la narrativa, la poesía, la música o'l cine... En verdá, tien munchos ellementos comunes col cine y creyo qu'axunta toles carauterístiques que tien que tener un arte: Ye una suerte d'amestadura ente'l teatru y la pintura, un cine ensin movimientu pero que ta igual de vivu que les otres.

¿Qué ye d'una infancia ensin los llibros de Tintín, Astérix y Lucky Luck? (He reconocer qu'a min Spirou, Mortadelo y Zipi zape nun me prestaben nada) Nun quixere que'l mio guah.e si dalgun día lu tengo medrare ensin conocer a Tornasol, a Hernández y Fernández, los cagamentos del capitán Haddock o les intrigues polítiques de Sildavia y Borduria... Nun veo por qué hai un llugar pal premiu, pal renome d'autores como J.K. Rowling, García Márquez, Botero, Picasso... y nun lu hai pa Hergé, Morris, Uderzo o Goscinny.

Igual "Domno" de J.A. Marinas nun ta al altor d'Hergé (personalmente nun me gusten los cómics d'anguaño onde vese tanto'l pasu del Ordenador), pero ye nuestru y merez el mesmu espaciu (o más) que bien d'autores de la "lliteratura serio" (Poesía, Novela y Teatru). Lo dicho, que nunca naide s'alcuerda de les caricatures de los periódicos, que finen por enllenar bien de páxines nos llibros d'hestoria (los franceses polo que vi nos mios llibros teníanles mui bones nel XIX), pero yo alcuérdome de Neto y d'Alberto Vázquez. Diba ser murnio nun s'alcordar de xente d'esti talentu (¿¿o nun ye talentu sacar una risa d'una situación llaceriosa??) namái que cuando muerren y naide nun-yos reconoza en vida el so valir, que ye mui grande.

Ye normal tené-y ganes a muncha xente. Hasta ye normal desear que muerran políticos, personalidaes, xente enemigo de los drechos civiles... Ye normal querer la muerte de Saddam Hussein, de Bush, de Hitler... y hasta ye normal desear querer meté-y una hostia a Gustavo Bueno, Félix de Castro y demás individuos...

Pero esi nun ye'l camín. Porque nun val más que pa identificanos con terroristes, persones qu'empleguen la violencia etc... etc... la sopresión física del enemigu ye una opción descartable nesta coxuntura (y l'amenaza tamién). Tamos enxertos nun sistema democráticu con unos drechos que (a lo menos no teórico) furrulen y valen.

Hai calces abondos pa tresmitir y esparder el mensaxe pro-drechos civiles n'Asturies, nun ye namái que con coses pacífiques como'l www.doilacara.net al que yá s'amestaron persones conocíes pel estáu como Llamzares y David Villa, sinón que tamién val dacuando l'usu de midides esceicionales, midides de desobediencia civil: Enzarros, fuelgues de fame, unviar documentación namái que n'Asturianu, encadenase, acampar delantre del gobiernu... etc, etc...

Nun toi diciendo que heba que conformase cola manifestación y el votu, hai más calces, hai los calces de la desobediencia civil y vimos que valieron pa que Gotor punxérse col asturianu y cola xente enzarrao... ¿Pa qué valió dir a amenazar al anti-asturianu ési? Pa que Gotor y la xente se punxeren con él na defensa de les llibertaes (y paezme normal). Una cosa ye llamalu pol so nome (represor, anti-drechos civiles, anti-asturianu...etc) y otra mui estremada ye dir a poné-y los güevos na corbata... Que nun digo que nun preste ver medrana nos güeyos d'esti paisanu, nin digo que nun lo mereza... Lo único que digo ye que nun se debe facer porque ye como dase d'hosties a ún mesmu, ye incívico y nós tamos lluchando polos drechos civiles.

Si nós somos superiores como persones y como coleutividá a Félix de Castro y a la so xente ye precisamente porque nós tamos colos drechos civiles... Si los dexamos de lláu ponémonos al so nivel... y yo personalmente nun quiero cayer tan baxo.

Acabó l'encierru y acabó bien. Una amuesa de que la presión direuta si la xente s'implica y creese'l so discursu acaba por consiguir les coses. Nun se vio nunca na hestoria pueblu o coleutivu dalu al que-y regalaren los drechos. Los drechos hai que lluchar por ellos, hai que combatir, dacuando hai que derramar sangre, dacuando namái qu'endelgazar nuna fuelga de fame...

pero a la fin, la llucha polos drechos implica siempres eso: Llucha. Les lluches gánense y piérdense... Esta batalla ganámosla (ganáronla), pero aínda nun ganamos la guerra... Entá queden munches otres, y les ganaremos si tamos dispuestos a ganales, a lluchar por elles col enfotu de ganar, y non namái de facelo por un sentíu kantianu del "deber ser".