Escribo estes llinies dende Montréal, la ciudà màs poblada de Quebec, anque non la capital. Y otra vez pido disculpes pola grafìa del teclàu, agora canadiense.

La verdà, que lo primero que-y llama a ùn l'atenciòn ye la normalidà de la llingua francesa nesta provincia. Ye la ùnica llingua oficial, anque tol mundu ye quien a falar inglès (o eso creyo, yo la verdà seya dicha, quiero màs lo llatino) y nesa llingua tàn les rotulaciones... Podrìa ser un bon exemplu Quebec de que nun fai falta independencia nenguna p'afitar una cultura, una llingua y una identidà propio... Ente la dependencia de Quebec y la independencia d'Irlanda yo quèdome màs con esta... pa min la cultura y l'alma del pueblu tàn perriba de la so espresiòn polìtica, que nun dexa de ser una temporalidà hestòrica.

Sicasì, por muncho que se cite la tema de Quebec como un exemplu en munchos aspeutos, les diferencies con Asturies (amàs del "estàu de la materia") son la propia natura de la materia: Nun ye lo mesmo "sacar de casa" al asturianu que sacar de casa al francès... Resulta qu'al francès sacàronlu yà de casa en Francia, y d'una casa muncho màs importante, grande, afitada, reconocida y querida que la "Casa canadiense". Quiero dicir, que'l sofitu de la cultura francesa a la cultura quebecoise ye màs qu'evidente, y nun ye un sofitu espresu y pensàu como'l "Vive le Quebec libre!" de De Gaulle, sinòn que quièrase o non, toles televisiones, tolos llibros, toles producciones culturales franceses de toa tripa (traducciones, diccionarios, programes d'ordenador...) puen emplegase en Quebec ensin mayor torga... Nuna llibrerìa atopamos 2 estanterìes estraes de volùmenes d'autores de Quebec, pero'l restu de la llibrerìa son autores franceses qu'escriben nuna llingua que los de QUebec sienten como propia, que ye una llingua "normalizada mundialmente" si se quier y qu'eso da munches màs facilidaes...

Tornando a la tema polìtica, y viendo que nos billetes, nes monedes, nos telègrafos y correos, na alministraciòn del estàu ta presente la llingua de Quebec y que nesta provincia ye la unica oficial... La verdà, quèdenme bien pocos argumentos pa la independencia que nun seyan d'esos que tan poco me gusten, los de tipu econòmicu... Evidentemente, esto nun dexa de ser una reflexòn del viaxeru, nun pretendo considerame un analista polìticu del Quebec nin ye un tema que m'esmoleza o del que sepia muncho, nun ye un testu de Tocqueville, son les primeres impresiones d'un europèu n'Amèrica...

Ensin tildes nin nada que se-yos asemeye escribo estes llinies dende la quinta avenida de Nueva York, a l'altura del Cental Park... Llevo dende;l 24 pela nueche n'America y toi descubriendo un mundu dafechu estremau al de nueso. Dicen que somos occidente y que mos asemeyamos muncho unos a otros. Y pue ser que lleven razon, pero les diferencies rescamplen auquiera que se mire. Nun ye Asturies-USA, o Espanha-USA, ye Europa-USA.

Los coches son mas grandes, mesmo que los cuartos del hotel, les cames, la xente... les barrigues son inmenses!! La xente nun ye frio, otru estereotipu rotu, ye amable y candial, tratente con sorrises y deseyente un bon dia nes tiendes. Hailos estresaos que van de chulos pela vida, pero vese l'amabilida na cai, nes ceres y na xente. Como digo, namai que l'estres acaba con ella dacuando.

 Vense barrios agrupaos pola emigracion, el chinu l'italianu... Y toos reconocense nos simbolos, na llingua y hailos que lleven les dos llingues con arguyu mentanto qu'otros arrenuncien a la de so pa ser verdaderos americanos. Nun hai una cara d'americanu como si la hai de frances, aleman, vascu o asturianu... Hai mil cares de mil races y nenguna ye mas que la otra... Dicen que ye'l pais de les oportunidaes y debe selo porque ves xente probe y rica de toles races y condiciones... Y non, nun hai mas probes qu'en Madrid.

Como digo, namai que vi Nueva YOrk, un cachin piquinhin de la inmensida d'esti pais. Atendi un poco pa la tele y los periodicos, senti los discursos d'Obama, Biden y demas na convencion democratica nacional y la verda, nun se de onde saca la xente que la socialdemocracia europea ye mas social que l'americana. En nada, en nada ye mas social ZP qu'Obama, en nada lo ye Segolene...

Como digo, llevo bien poco equi, pero abondo como pa querer siguir mas tiempu y descubrir un pais tan grande como esti... Segurida y problemes na frontera?? nun digo que nun los heba, pero yo nun los tuvi... En verda, munches coses que lleguen a Europa d'Esti pais tan pasaes per una pantalla que lo empuerca... Y nun digo que nun heba puxarra nos EEXX, Bush ehi sentau na Casa Blanca rescampla.... pero nin ye too tan malo nin tan feo... Anque bono, toi nun estau con un 70% de votu democrata nes eleiciones. Supongo que nun pueo dicir qu'esto seya l'america profunda... 

Nun queden nin 24hores pa qu'aporte a les tierres de Miranda. Taré ehí unes hores, abondes pa conocer la ciudá y daqué de los sos pueblos... Tentaré facer compres (llibros&discos) y daré parte rigurosu de lo qu'ellí vea...

Qué nervios!

Si ún calca equí atopará una noticia enforma bona. Yá yera hora de que se consideraren a les "oveyes prietes" de la cultura, como lo que verdaderamente son. Defínese l'arte asina:

 arte, l’/l’(a): sust. Capacidá [del home pa crear obres qu’espresen guapura, harmonía, sentimientu per aciu de la pallabra, del color, de les formes].  (DALLA).

La guapura, l'harmonía el sentimientu... ¿Ye la novela negra arte? ¿Y la de misteriu? ¿O la de risa? Poques coses hai más difíciles d'escribir (creyo yo) que daqué que faiga a la xente rir o tener mieu, y por embargu, nun paez que se consideren arte. Pero considérense cultura:

2 Materia o actividá [que ta acordies col progresu algamáu pola sociedá]. La lliteratura ye cultura

Paez evidente que'l vidiuxuegu ta acordies con esi progresu, mesmo que'l cómic y qu'otres artes que van faciéndose y desendolcándose nes últimes décades y que, por embargu, nun tienen consideranza de tales. Yo vi a xente facer d'una partida de rol verdaderu arte, narrar, interautuar, interpretar d'una manera que yá-yos gustaría a munchos actores y escritores... ¿Nun val tanto como un llibru imprentáu? Vi videoxuegos que son una escusa mala pa pegar tiros y que son puxarra (en verdá la mayoría), pero hai otros, aventures gráfiques y hasta dalgún d'estratexa que tienen unes trames argumentales complicaes, pensaes, bien feches, con vidios, con actores, con interpretaciones... Qué queréis que vos diga, gústame más la trama de Red Alert 1 y de Command & Conquer que la d'"El Invierno en Lisboa" (mayor petardada de llibru na vida lleí). Duke Nukem, Doom, Commandos, Medal of Honor... nun sedrán arte, nin probablemente cultura; pero Broken Sword o Eternam son obres maestres.

Pasa lo mesmo col cómic, que lu desprecien, cuando pasa con él lo mesmo que colos xuegos y colos llibros: qu'hai puxarra y hai obres maestres. Nun cambio un Tintín por un Código DaVinci, quiero más un Command & Conquer qu'un Quijote (anque depués lu regale si me dan "El Nome de la Rosa"). La xente culto, y nos (pocos) programes dende los que la elite cultural fala (toi pensando en Las Noches Blancas, de Sanchez Dragó, en Telemadrid, que veo dacuando) conderguen siempres cualaquier cosa que salga de lo políticamente correuto, ye meyor una puxarra inspirada na Odisea qu'una bona novela inspirada nel cine o pensada pal cine. Y esto dizse dacuando con un aire despeutivu "Eso ta fecho pensando nel cine", como si fore malo. Como si Lope de Vega o Calderón nun pensaren nel teatru (el cine qu'había daquella). L'otru día, precisamente nesi programa, ún -nun m'alcuerdo del nome- dixo que la lliteratura tenía qu'elevar la cultura popular pero al empar beber nella...

Paezme que nun se podía esplicar meyor. La cultura popular d'anguaño nun ye'l teatru (por eso lleven décades diciendo que ta en crisis), son el cómic, el xuegu d'ordenador, el cine... Y nesos xéneros, como na novela o na poesía, hai verdaderes obres d'arte y muncha puxarra... 

Les series de TV (les películes tamién, pero más les series) tienen muncha importancia na cultura d'anguaño. Nun sé si daquién estudió esi fenómenu sociolóxicu, pero'l referente o referentes qu'asitien tienen muncha importancia. ¿Cuántes veces sentistis a daquién dicir que tal o cual persona "come como Homer", "ye tan borde como House", "tan basta como Aída"... etcétera. 

Nel institutu y na escuela, los guah.es imiten les frases propies d'estos personaxes, repítenles y ríense. Na edá adulta, dacuando les repiten, pero munches veces vienen na conversación escenes o "gags" d'eses series, como momentos comunes d'un imaxinariu coleutivu. Una de les coses que más me llamó l'atención de la importancia que tienen les series, foi una vegada, va tiempu, de la qu'escoyí carrera (o al poco d'escoyela) entré nun foru de xente que falaba de qué carrera diba facer y un poco d'universidaes, precios d'alquileres y tal.... Una moza dicía que taba farta de la xente, qu'ella llevaba queriendo facer criminoloxía dende cuantayá, y qu'agora nun sabía si-y diba abastar la nota, porque diz que desque punxeron CSI el númberu de xente que quería facer la carrera aumentó d'una forma descomanada...

Yá sé que nun hai nenguna serie d'un home o muyer qu'estudió ADE... pero la perceición social que da una serie d'un personaxe con una profesión, ayuda a ún a decidir qué quier ser na vida, ayúdalu a descubrir coses o factores d'una profesión, etcétera.

Pienso que los poderes públicos deberíen tamién regluar les series de producción propia de les cadenes públiques (les privaes que faigan lo que-yso dea pola gana) y les series non propies que s'emitieren tuvieren que comprobar qué valores tresmiten... 

Aída, Siete Vidas, Aquí no hay quien viva, Periodistas, Compañeros, Hostal Royal Manzanares, aquella de xente que baillaba nuna escuela, Los hombres de Paco... Hai dos coses mui importantes y comunes d'estes dos series: Primera: Toes, absolutamente toes ensin esceición, ambiéntense en MADRID. Segunda: Nenguna, absolutamente nenguna, tien l'ámbetu rural como escenariu. Y non sólo eso, sinón que les poques referencies o tratamientos a esti ámbetu son despeutives.

La verdá, na TVE, facer una serie ambientada nun pueblu d'Asturies diba ser absurdo (porque entós tendría que ser n'Asturianu)... Pero, ¿Nun habrá pueblos en Cantabria, Castiella, Andalucía, la propia comunidá de Madrid, Murcia, Aragón... que falen castellanu y qu'amuesen una perspeutiva rural? Paezme que Los Mundos de Yuppi taba nun pueblu, véolo borroso agora... Nun sé, ye verdá qu'hai poca xente que vive n'ámbetos rurales. Paezme que'l 80% de la población d'España ye urbano... Si españa tien 45M de persones, eso quier dicir que tenemos 9M de xente que viven nun pueblu, n'Asturies más d'1/4 de Millón. Si vemos qu'en Madrid viven 6M de persones... ¿Por qué tantísimes series ambientaes en Madrid y nenguna, absolutamente nenguna, nun ámbetu rural? Cuestión de númberos yá vemos que nun ye. Namás qu'el 13% de los españoles vive en Madrid, y el 100% de les series ambiéntense ende... Da qué pensar.

¿Nun sedrá que mos tán tresmitiendo un modelu de lo que ye correuto? ¿De lo que ye normal? A la xente nun-y estraña que pase esto, venlo normal, sobre manera en Madrid onde tiene una mentalidá de que Madrid ye la "Nova Roma" y lo demás son "provincies" (nun ye coña, sentí-y a xente afincao en Madrid falar de lo demás como "en provincias"). Pero vaya, qué cosa, resulta que fui al Reinu Xuníu esti veranu y ellí ambientaben una serie en Londres, otra en Manchester, otra nun pueblu del norte d'Inglaterra... Vamos, lo que ye una TV que busca ser un reflexu del pueblu al que sirve o que tien que vela...

(Mesmo que TeleAreces, coles sos 23,30 hores de castellanu al día, y les películes del oeste y series americanes males, ensin siquiera les sotitular/doblar al asturianu)...

Naide apara nello, pero nun ye normal qu'un mozu de Collada, Cuartu de los Valles, Tinéu; que namái que fala asturianu les 24h del día, que anda col tractor y que cuida de les vaques, tenga que se referenciar na serie d'Aída, o tenga que sentir les noticies en castellanu... Ye tan ridículo, como si agora fixéremos que toles series que ven los guah.es de Madrid tuvieren ambientaes en Grau, falaren n'asturianu los personaxes y diéren-yos les noticies tamién n'Asturianu. Pero vamos, yá sabemos qu'en esti país tan guapu llamáu españa, les coses nunca, nunca, nunca son de doble direición. Lo que val pa ellos, tien que valir pa nós; lo que val pa nós, nun pue valir pa ellos... Ye lo que se llama colonialidá, una minoría (13% d'España) impón o "difunde" los sos "espacios comunes", el so mou de vida, les sos problemátiques, los sos debates, a una mayoría silenciosa que nun ve reflexao esi tratamientu pa colo que ye d'ella. Ye l'asimetría, la mesma asimetría llingüística que fai qu'anque l'asturianu fore oficial, nós tuviéremos la obligación de conocer otra llingua que nun ye la de nueso (el castellanu) y el madrileñu nun la tuviera.

 La asimetría llingüística, ye tamién una asimetría cultural, de poder, de idees, de fuercies, de modelos... El problema ye, que'l modelu que tenemos, mesmo'l llingüísticu que'l cultural, ye'l que nós como pueblu refredamos día sí día tamién. Paez que mos presta más una serie ambientada n'Esperanza Sur, Comunidá de Madrid; Desengaño 21, ciudá de Madrid; qu'una en Ventanielles, Vallobín, Pumarín, San Cloyo, Natahoyo, La Calzada o qu'una na Plaza'l Güevu de La Villa... ¿Ye más "cool" vivir en Vallekas (sí con K) qu'en Ventanielles? ¿"Mola más" llimpiar escaleres como aída que ser xateru? ¿Ye más guai ser profesor de matemátiques nun barriu de madrid pa que te faigan una serie, que maestru d'Asturianu en Mieres? Paez que sí, y paez que mos gusta...

El conceutu gústame. Racionalizar el gastu públicu ye una idea mui lliberal, mui democrática, mui republicana... mui de progresu.

A lo último, viense identificando la idea de "racionalizar el gastu públicu" col amenorgar de puestos públicos, col recorte de servicios, les privatizaciones masives y la esternalización ¿Pero en verdá ye esto racionalizar el gastu públicu?

Pa sacar un exemplu rellacionáu col asturianu sobre les diferencies ente amenorgar el gastu públicu y racionalizalu:

Exemplu 1: Enseñu d'Asturianu nos colexos ya institutos:

Anguaño hai una plantiya d'un numberu indetermináu de profesores y maestros d'asturianu y una campaña de captación con cartelos nos colexos, cuñes radiaes y publicidá institucional.  Los costes de los profesores son X; los de la campaña son Y. Evidentemente, los profesores cuesten muncho más que la campaña, pues faen un llabor continuáu y la campaña faise nunes feches concretes.

Un gobiernu que quiera "amenorgar el gastu públicu" (lo que llamen mal llamao "racionalizar"), amenorgaría la plantiya, esplotaría a los profesores mandándolos itinerar d'un colexu a otru (yá ta faciéndose) y dexaría igual o nun-y daría más pola campaña de matriculación. Non sólo eso, sinón qu'igual aumentaría'l coste d'ella pa que vieren que'l so gobiernu ta comprometíu cola llingua. A la fin, los costes son X - 10 ya Y + 10; pero como X ye muncho más que Y, los costes totales vense amenorgaos, y les prestaciones y la calidá del serviciu tamién.

Racionalizar el gastu públicu, nesti casu, diba ser nun facer nenguna campaña hasta nun tener capacidá d'ufiertar l'asturianu en tolos colexos, porque faense entós gastos irracionales. Por poner un exemplu, de la que yo diba a bachiller, punxeron cartelos nel mio IES colo de "Yo apúntome tamién a Llingua asturiana"... Yo pidílo y nun me dexaron. ¿Tán bien gastaes les perres nesa campaña? ¿Ufierten en verdá un serviciu?

Exemplu 2: Rede, email y propaganda escrito.

Los mios padres son maestros, funcionarios del Principáu, y bien de veces yá conxeláron-yos el sueldu como a tolos funcionarios, quiciabes bien ceo vaigan sufrir otra conxelación... 

El principáu, nel so compromisu cola modernización, dio-yos a cadún de los profesores (atrévome a dicir que de los funcionarios que tien) una direición de corréu de baldre, qu'al principáu costará-y una cantidá determinada... ¿Qué sentíu tien que les fueyes informatives d'unes xornaes de formación pal profesoráu vengan a casa nun sobre, imprentaes nun folletu de bona calidá, habiendo como hai una direición d'internet puesta pol propiu principáu? Más perres marafundiaes. 

Exemplu 3: Privatización d'AENA.

Dio anuncia'l gobiernu va poco de la privatización d'AENA. Como yo yá dixi, hai privatizaciones que les comparto y véoles estupendes: Telefonía fundamentalmente, creyo de fechu qu'en proporción col serviciu que tenemos, agora, tres de lliberalizase'l mercáu pagamos menos qu'enantes. Quiero analizar esti otru casu de "Racionalización Presupuestaria":

AENA (Controladores aéreos, personal d'aeropuertos etc, pal que nun lo sepia), agora, tien unos gastos X. Y defenden como solución p'amenorgar los gastos la privatización. ¿Qué consecuencies tien la privatización? De mano l'estáu va recibir perres en conceutu de compra d'esa compañía por un particular. Eso pue tar bien pa los fondos del estáu, pero ye un pagu (total o fraccionáu) y nun ye una rellación que se caltien nel tiempu, polo que tenemos perres agora pero mañana non.

Darréu, el particular "racionaliza'l gastu" quier dicir, despide xente a esgaya, pon a la xente a trabayar les másimes hores permitíes (pel momentu 40 selmanales, quien sabe si colo de la UE sedrán más)... cola consecuencia d'una reducción del gastu y de la calidá del serviciu, amás del empléu. ¿PAez malo? Ye peor, porque'l particular, en réxime de concesión alministrativa, opera un serviciu públicu y devien n'intermediariu nuna rellación estáu-trabayador, qu'agora ye estáu-empresariu-trabayador. Métese al empresariu, nun s'algama l'oxetivu de la competitividá ¿¿¿Cómo va haber competitividá con controladores aéreos??? ¿¿¿Van los viaxeros escoyer qué controlador quieren que controle'l so avión??? y esi empresariu enriquezse nesa intermediación (poco o muncho, pero son perres que namái que tán pagando a un empresariu que nin compite, nin arriesga, nin innova, nin fai nada p'amenorgar el coste con igualdá de serviciu).

Exemplu 4: RENFE

Igual vos acordáis de qu'había un tiempu nel que la vixilancia de RENFE y d'eses coses facíenla policíes (o de los aeropuertos). Agora amenorgó la plantiya de policíes y en cuenta de policíes metieron a guardies de seguridá. Si un policía ganaba 1500, un guardia de seguridá gana 900, si un politíca tenía una formación X, el guardia de seguridá tien una formación muncho menor. Igual que nel exemplu anterior, métese un intermediariu que gana perres, (igual la diferencia de 900 a 1500) y la reducción del gastu faise esplotando a los guardies, con más hores, con menos perres o de cualaquier manera.

¿Qué ye (o habría ser) racionalizar el gastu públicu?

Exemplu 5: Bedeles.

Na mio facultá hai non menos de 10 bedeles, contando turnos de mañana y tarde, cuando, de mano, paez que con 3 ó 4 ye abondo. Si ún s'avera pela facultá pue comprobar cuánto "trabayen" los bedeles, y cómo la mayor parte'l tiempu échenla faciendo sudokus y crucigrames... o lleendo un llibru los más cultivaos. Per contra, nel colexu onde trabaya mio madre, nun tienen nengún bedel porque'l Conceyu de Llangréu nun quier/nun pue ponelu... Esto quier dicir, que la Facultá de CCPP de la COmplutense pue pagar a 7-6 persones más de les necesaries, pa nun facer lliteralmente nada, al tiempu que nun colexu públicu na cuenca'l Nalón, ye la direutora la que tien que madrugar y facer les xeres propies d'un conserxe. ¿Racionalización del gastu? ¿Úla?

Otru día podría falar de los comederos qu'hai alrodiu d'una alministración. Un día que tenga un poco tiempu garro un organigrama del principáu y ponémonos a contar cuántes families viven direutamente de puestinos menores (munchos d'ellos igual nin sentistis nunca'l nome o sabíeis qu'esistíen)... La verdá que'l númberu que mos diba salir yera bien curiosu.... Pero eso vamos dexalo pa otru día.

TÁUTIQUES y OXETIVOS:

Procuradoría Xeneral: Ye una institución asemeyada a la del defensor del pueblu, cualaquier persona pue plantega-y quexes, protestes o reclamaciones, nun entamu tán obligaos a responder de manera motivada. Pue ser usada la institución de manera individual o coleutiva. Fai un informe añal, tien más poder simbólicu qu'otra cosa y pue investigar y facer recomendaciones a les autoridaes.

10.000 firmes: Ye'l númberu necesariu de firmes pa presentar nel parllamentu una propuesta de llei (que depués el parllamentu aceutará o refugará a voluntá). Nel casu de que s'almita a trámite, una comsión de los proponentes (5 persones o alredor) puen defender el testu en sede parllamentaria. Esta propuesta nun pue tener por oxetu l'estatutu nin el réxime financieru.

Quexes y Suxerencies: Departamentos que tienen les más de les empreses públiques y la mayoría de les privaes. Una bona manera de visibilizar demandes y facé-yos llegar esi mensaxe a les autoridaes / direutivos de la empresa. 

Drechu de pidimientu: Drechu que tien tou ciudadanu asturianu d'unviar una pitición al rexistru de la Xunta Xeneral o a cualaquier otra institución. La Xunta Xeneral podrá almitila o non a trámite, aceutala o refugala, pero'l drechu esiste. El drechu ta reconocíu na propia constitución y si ún quier, pue unviá-y 20.000 cartes al conseyeru d'educación.

Carta Europea de les Llingües amenazaes: Testu llegal adoptáu pol estáu español que ye d'aplicación p'Asturies y Aragón en tolos puntos, según interpretación del Congresu de los Diputaos, ensin la misma fuercia vinculante que pa les otres autonomíes con llingua cooficial.

Votu: Actu de calter individual que tien más incidencia que tolos anteriormente amentaos. El votu cambia les personalidaes ya ideoloxíes de les instituciones amentaes.

ESTRATEXA: (inspirada nel blogue de MunduXaime)

Aneciar: Ponese neciu o [más] neciu.

Neciu, -a, -o: Qu’insiste nun-y importando si tien o non razón [en daqué]. 2 Desobediente, dau a desobedecer.

Agora hai un poco de debate cola tema del referendu p'aprebar l'estatutu-ordenanza de conceyu d'autonomía. En verdá, tien sentíu votar l'estatutu de la que se fai, pero a estes altures ye dalgo absurdo. Esplícome: Daquella nun había manera de saber qué pensaba la xente del modelu autonómicu, si-y gustaba si ye lo que queríen etc... Yera una manera de dirixir a los políticos y d'amosa-yos cuál ye'l camín pel que quier dir la sociedá.

El referendu como figura xurídica (y política) tien xacíu en decisiones d'especial trescendencia, que cambien en muncho l'estatus xurídicu o políticu d'una comunidá: Nun hebo referendu na constitución pa permitir el votu d'estranxeros comunitarios; pero habríalu pa decidir la forma del estáu o les funciones de los poderes o los drechos y deberes. Otra manera, el referendu úsase davezu en decisiones mui controvertíes, inesperaes, o que precisen d'un sofitu ampliu na población como manera de resolver una crisis: La crisis d'identidá del PSOE cola tema de la OTAN foi un exemplu claru d'esto.

N'Asturies, l'estatutu que proponen agora PP y PSOE (y mieu me da qu'IX s'ameste al comboi) nin ye la solución a una crisis política (PP y PSOE tán d'alcuerdu y con ellos l'80% y picu de la sociedá), nin ye una reforma d'especial trescendencia. ¿Dannos drechos? ¿Impónennos obligaciones? ¿Cambien el marcu de coesistencia (pa min ensin oficialidá nun hai convivencia) que ye l'estatutu? ¿Hai cambeos fondos na situación social o política d'Asturies col nuevu estatutu? La respuesta ye non. Ye tan absurdo votar esti estatutu como votar una llei pa regular los parquímetros...

Otra cosa ye que dende les conceiciones d'ún, la democracia participativa seya'l modelu y ún defenda'l referendu en too porque ye esi'l modelu de sociedá que considera exemplar. Yo por desgracia, pienso qu'ensin cultura política nun hai democracia participativa que facer, qu'eso namái que yera posible nuna polis de xente lletrao, ocioso y sabio; pero imposible nel país que ve "Escenas de Matrimonio" (mencionó la serie Pablo Texón l'otru día nel blogue d'él, y agora vila na TV, y plasmé de la puxarra que faen), que pierde'l xacíu cola eurocopa y que vota a los políticos que vota.

Asturies, nun universu ideal y paralelu, tendría que tar votando masivamente un estatutu con drechos (non sólo la oficialidá), col estatutu de nacionalidá p'Asturies (que ye lo que somos, nun somos nación política, pero sí una nacionalidá cultural), con deberes, con un nuevu marcu competencial... Pero nun tamos nun mundu paralelu, y a min paezme que nes circunstancies actuales pidir un refrendun ye como pidilu daquella que reformaron la constitución pa poner lo del votu d'estranxeros: Un absurdu.

Pero bono, si AA y demás xente d'esquierda (cónstame que tamién n'UNA hai xente que ta pol llabor) quier facer d'eso la bandera política... Otra vuelta que desconeuten cola xente d'Asturies no que quier, y que nun saben valorar - a lo menos yo véolo asina - la figura d'un referendu que ye pa lo que ye: Pa da-y solemnidá a los grandes actos políticos, pa resolver crisis y p'asentar marcos xurídicos estables. N'Asturies, anguaño, nun se cumple nengún d'esos requisitos...

Y defender na sociedá del PPSOE una democracia participativa, abierta, con presupuestos participativos, conceyos abiertos, participación ciudadana hasta na sopa... ye como na gran película La Vida de Brian, pidir el drechu de los homes a parir... ¿Qué mos soluciona un referendu y qué mos soluciona la conceición política que lleven arreyada los que lo defenden anguaño? N'Asturies hai qu'atacar no cultural: Valtar la cultura política d'Hunosa y Muface, de sovención y comederu, de súbditos a los que-y dan la comida fecha, y facela de xente emprendedora, non namái que no económico, sinón tamién no político y no social... Namái que con persones independientes, que piensen y actúen por sigo mesmes, va ser posible algamar la cultura política que valga de base al modelu que defende la esquierda nacionalista (AA, UNA) y española (IX) n'Asturies.

Yo soi d'Uviéu, y masque seya la ciudá menos asturiana d'Asturies - por desgracia - sigui siendo onde más m'afayo y nun la cambiaba nin por Llanes, nin por Mieres, Xixón o les cuenques...

De sobra sabrá'l que me llea que nun trago Madrid, y qu'odio la mentalidá que paez que trescala ellí a la mayoría de la xente (Provinciano, creyío, egocéntrico...); la españa cañí de la "lengua común" y de Rosa Díez. Creyo que Rosa Díez ye la política que más representa la mentalidá madrilana.

Sicasí, hai una ciudá nesta península del Occidente d'Europa - de les munches que conozo - que me presta tanto o casi que tanto como Uviéu: Lisboa. Ye yá la segunda vez que voi, esta fin de selmana (por eso nun actualicé), y ehí tuvi, esfrutando del Fado, de la brisa de la mar, del mercáu na Praça do Comerço, de la que ye pa min la llingua más guapa del mundu tres de l'Occitanu prenunciáu al mou de la Provenza. Prauticando portugués colos taxistes faches (hailos tamién) y falando de la Revolução dos Cravos y de cómo pa él agora nun hai llibertá y hai menos seguridá nes cais... Lisboa, Portugal, nun dexen de tener l'encantu del vieyu reinu ibéricu que nin foi oxetu nin suxetu de conquista (na península), un espeyu o realidá política (pa los gallegos tamién cultural) de lo que sedríemos anguaño de dir per otros caminos la hestoria. Siéntolo, nun soi a escapar del magnetismu de la hestoria-ficción. 

Los portugueses, a lo menos la impresión que me dieron, ye que son persones humildes, nada babayes, qu'amen la so tierra y que n'ocasiones, achanten un poco cuando llega l'español prepotente que quier que-y falen na so llingua y nin "Bom Dia/Obrigado" ye a dicir. Talamente que nós. Ye pa min la tierra de la saudade (señardá), non pol fado nin porque anecien en repitilo, nin porque-y dediquen una cai "Rua da Saudade"... Sinón porque ye eso: "lembrança triste e suave de pessoas ou coisas distantes ou extintas, acompanhada do desejo de as tornar a ver ou a possuir"... Alcordanza de  lo que ye tener un país nesta península, al pie del Atlánticu, llibre nel sen más fondu de la pallabra, que mira arguyosu al futuru y onde'l pueblu ye realidá y non utopía. Onde pues sentir un fado mirando a la mar cola lluna en cielu...

Quédame Miranda, pal 21 d'Agostu, primero de marchar pa Canadá y los Estaos Xuníos. Un viaxe de pelegrinación que tenía que ser obligáu pa tolos asturianos del royu. Por fortuna voi tener guía, el mio amigu Mirandés a quien-y llevaré un llibru... Yá vos contaré d'ellí y de los llibros y CD's n'asturianu (de Miranda) que seya a mercar y algamar.

La semeya que punxi gustóme polo que tien de política y de post-moderna, pensé en poner la típica postal, pero gustóme más esto.

... Acabo de desembarcar va unes poques hores nel Ubuntu. A la fin tanta campaña pro-ubuntu valió hehehe... Anque tovía nun soi p'atopalo amañoso, porque soi nuevu y cuéstame avezame. (Por suerte - o desgracia- tengo tamién el windows vista ehí puestu por si acaso...).

Nun sé cómo faigo pa oyer radiosele, porque nun me reconoz el soníu... nin sé cómo usar el messenger o similar pa chatear col hotmail, nin sé si hai un firefox 3 n'asturianu o l'open office... Otra manera, lo que más mieu me da ye lo de l'antivirus, que yá entamen les publicidaes eses tan pesaes y nun sé qué facer.

Pero bono, estes coses negatives espero que vaigan cayendo pasu ente pasu, pel momento equí sigo, emplegando la guía que mos dexó http://blogs.altuxa.com/tapaponga. Diré informando puntualmente... :-)

1977-1991: Hai un movimientu pol asturianu, pero ye mui feble, la xente identifícase plenamente colos partíos mayoritarios y estatales y el programa qu'ufierten. Como hai un movimientu pro-asturianu, hai delles midides pro-asturianu. Les más d'elles, les más "fuertes" como la escolarización o l'Academia, faense precisamente primero de les primeres autonómiques (1983), porque aínda nun se sabía la fuercia verdadera d'esi movimientu cultural-nacional-políticu que ñaz alredor de Conceyu Bable. La perceición que tienen los partíos n'Asturies del asturianu y el fechu identitariu ye, de mano, la cautela, y tres de les eleiciones xenerales esa cautela va tornándose en conciencia de tar fuertes énte él: 0 diputaos pal asturianismu en 1977, y yá en 1983 afítase yá la idea de que lo del asturianu ye daqué políticamente non-rentable. Y cuando dalgo nun ye rentable, la inercia emburria a ún a dexalo tar...

 1991-1999: Entra la CA nel parllamentu nel 91 y el PAS nel 95. Agora la perceición del asturianu cambia muncho, vese como una bolsa que da votos, nada menos qu'un diputáu de 45, un 3% de los votos, qu'anque nun ye muncho, pue cambiar el resultáu d'unes eleiciones. Hai un movimientu haza l'asturianu y l'asturianismu, pero tampoco nun se quieren asumir riesgos, percíbese a esa minoría como lo que ye: una minoría, y nun se quier arriesgar muncho: IX cambia d'actitú y compromisu nesa dómina y hai un xiru... Los partíos nun ven problema en nomar al asturianu como lo que ye, una llingua, y en pautar una llei mui bona (otra cosa que nun s'aplique) que ye la de 1/1998 d'usu y promoción. IX comprométese porque ye otra causa minoritaria más y nun ta mui en desalcuerdu col programa qu'ellos defenden n'otres autonomíes. Los otros partíos son más cautos, pero hai averamientu.

1999-Anguaño: Esa llei, nun s'aplica en gran midida porque nun hai partíu que lo esixa en parllamentu. IX comprométese porque vio que-y dio bon resultáu, xube n'escaños. Los otros partíos tienden a ver al asturianismu como'l taparrabos ideolóxicu de personalismos (Xuan Xosé, Marqués) y caguen un poco pa él. Considérase qu'esa minoría representativa (3%) que votó PAS y CA quedó satisfecha con esa llei, viose nes siguientes llexislatures que nun entró en parllamentu, asinque por mui al altu la lleva que digan que tán siendo maltrataos, nun movieron una dea por ello y nun ameriten la consideranza de los partíos mayoritaros.

En definitiva: L'Asturianismu nun pue aspirar a gobernar (a curtiu plazu), nin siquier pue aspirar a ser llave, pero podemos aspirar como ciudadanos a unvia-yos mensaxes a los partíos mayoritarios... Pa ellos l'asturianismu ye una fonte de votantes, qu'esiste en tanto que tea representada en parllamentu: Un escañu a la UAS, o a UNA o a lo que seya, ye un mensax: Cuidáu, tamos faciéndolo mal nesti tema, vamos asturianizanos. Un escañu ecoloxista llevaríalos a pensar: Cuidáu, tamos tratando mal al mediu ambiente, vamos da-y más rellevancia... Y si sal un partíu de vildes y xubilaos, igual, igual... Van xirar p'hacia eso. ¿Por qué? Porque PP y PSOE nun son partíos ideolóxicos, sinón partíos institucionales: Son empreses de colocación, de trabayu (hai cantidá de xente que tien paga del PP o del PSOE), son organismos de xestión y básicamente ye imposible maxinar un estáu o una comunidá autónoma ensin PSOE y ensin PP.... ¿El restu los partíos? Son ideolóxicos y manden un mensaxe: El grandor d'IX condicionará les polítiques más o menos esquierdistes del PSOE, la esistencia o non de nacionalismos condicionará les polítiques del PSOE y del PP: ¿POr qué en Galicia'l PP defende la doble nacionalidá gallego-española de los gallegos? ¿Por qué alcuerda un sistema educativu col 50% en gallegu col BNG y el PSOE? Bien cenciello: Porque hai un 20% de gallegos que manden mensaxes con esi tema. Equí nun mandamos mensaxes queremos xugar a ser grandes y a facer partíos super-guais y a suañar con conquistar el poder y sentar un presidente nacionalista na Xunta Xeneral y va asina...

Hai qu'asumir trés premises
A) PP y PSOE son medios de direición institucionales (por eso hai xente que fai entrismu y paezme estupendo), y son una parte más del estáu como la seguridá social, igual de politizada... Según quien gobierne, según lo que quiera la xente asina furrulará la SS, el PSOE, Facienda, el PP, etc... ANalizái les persones que tán nel PP y nel PSOE que conozáis, y mirái si son persones con una ideoloxía clarísima o por embargu son persones que nagüen por tener un futuru, tocar poder, etc, etc...

B) La única manera de tresmiti-yos a esos partíos un mensaxe, amás dl entrismu, ye facer un partíu asturianista qu'entre en parllamentu, pueda condicionar la política y al empar ellos percíbenlu como un mensaxe p'asturianizar les sos polítiques. La esistencia d'esi partíu garantizarános l'asturianidá del PPSOE mesmo que la esistencia de los xueces garantízanos la xusticia: Hai un control al PPSOE.

C) Pa nós gobernar ye un mediu pa consiguir un fin, pa ellos gobernar ye un fin en sí mesmu: Por eso ellos van gobernar siempre, y nós nunca. Por eso tenemos qu'aspirar a que pa ellos consiguir el so fin tengan que consiguir el nuestru...

Un reló, armáu, con toles sos pieces, furrula y da la hora. Toes eses pieces, separtaes anque impecables, nin furrulen, nin dan la hora nin valen pa nada.

Podría tar falando de política, y nun m'enquivocaría que PAS-URAS+UNA sacaben escañu y 1 escañu ye más q 0,8 d'escañu y 0,3 d'escañu... Y hasta de xuru que con esi escañu UNA y PAS-URAS diben poder aplicar muncho más del so programa que lo que van aplicar agora... Pero tampoco voi a aneciar diciendo que cuando naide se pue permitir sacar les coses él solu faise necesario xuntase col vecín.

 Esto, que paez que ye propio de la política asturianista: tener a unes decenes de persones trabayando como burros n'UNA, otres decenes de persones trabayando como burros n'AA y otres decenes de persones tra... digo, nel PAS; resulta que ye tamién propio del mundu de los diarios dixitales. Enteréme pol blogue del Trasgu que ñaz güei un nuevu diariu n'Asturianu: www.aruelu.com. Y vi un comentariu ende que dicía qu'agora cada facción del asturianismu tien el so mediu-portal dixital: Asturies.com, asturnews.com, aruelu.com, infoasturies.net, glayiu.org...  Yo nun sé cuántes persones trabayen en cadún d'estos diarios, pero poniendo que seyan 2-3, sálennos 10-15 persones trabayando...

Llueu resulta qu'ún va a Asturies.com, y el día que más noticies hai son 5... n'Asturnews.com como muncho 3 ó 4, anque ehí ponen vidios dacuando y eso agradezse, glayiu.org ya infoasturies.net asemeyao y aruelu entré güei y teníen 3 noticies del día 30 (nun teníen nin del 31 nin del 1), vamos dientro de la media. Y agora entrúgome yo, si nun diba ser posible axuntar a toes eses persones, facer un diariu dixital curiosu, con 40 oticies diaries, con una seición de política, otra de cultura etc etc... Abiertu a toos, nel que cadún pudiere dar les sos opiniones (seyan d'un sector o d'otru), nel que los articulistes tuvieren polémiques los unos colos otros en cuenta de ser toos d'un mesmu palu... (y eso ensin contar la edición dixital de Les Noticies que va nesa llinia)

Taría bien. Pensé na radio, na única qu'hai: Radio Sele. Ehí tol que quiera pue facer un programa, nun da más que seya d'IAS, d'AN, de FAI, d'AA, del PAS o de cualaquier otra cosa. ¿Por qué nun ye posible un diariu asina? Ellos siguiríen dando les sos interpretaciones de les noticies, seguiría habiendo munches columnes, alderiques internos, y los lleutores ganaríemos muncho más en calidá, en cantidá... podríemos lleer TOLES noticies n'asturianu y non 3 ó 4 seleicionaes o fusilaes...

Mirái sinón esti periódicu dixital gallegu la de coses que tien: http://www.vieiros.com. ¿Costaba muncho facer daqué conxunto? En fin, lo de dixebrase na política puedo entendelo, lo de dixebrase nos medios de comuncación, non.