Competividá (o por qué fracasa l'asturianismu)
Voi permitime echar otra vegada más la llingua a pacer, y facer una reflexón de les causes poles que l'asturianismu fracasó nestes eleiciones y vien fracasando nos últimos tiempos...
Ye la falta de competitividá. Y ello ye que la política, y sobre manera a la política que se fai (o debiera facese) col envís d'algamar asientos en parllamentu, tien muncho que ver coles téuniques de mercáu que se-y apliquen a otros productos. A fin de cuentes, non pol so calter esceicional de mercase una vegada cada 4 años, ye'l productu políticu un productu esceicional. Hai productos, como'l pan, que mercamos tolos díes, otros, como la vivienda que los mercamos una vegada cada munchos años, y esti ye ún que se merca cada 4 (sacantes esceiciones d'anticipaes y coses asina).
Poro, si partimos d'esti puntu, si asumimos que la opción política ye un bien o serviciu más de mercáu: Ye daqué que va sirvir al ciudadanu, que'l ciudadanu busca que-y sirva bien, que satisfaiga les sos necesidaes, que si nun-y convez puea camudar por otru... Mesmo qu'una caldera de calefacción o una compañía de seguros...
Ensin entrar a evaluar lo que ye la "política d'imaxe", que daría pa un llibru enteru de crítiques: El cómo se faen los videos, lo probetayos que son, el cómo son los logos, l'escenariu que (nun) se monta pa los discursos, la (poca) diferenciación del líder y personificación de la campaña, les (ausentes) músiques o cancios eleutorales, voi centrame más no que ye'l productu en sí y si satisfai o non les necesidaes del consumidor más que nes formes de vendelu, que son más bien males.
1.- Un productu pa un pueblu, non pa una estaya d'él: Ye'l primer erru que quiero analizar. Cuando una empresa fai un desodorante, por exemplu, quier qu'esi desodorante aporte al mayor númberu de persones posibles, qu'heba'l mayor númberu de compradores posibles... Poro, buscará un desodorante nel que la rellación calidá-preciu tea rellacionada, seya baratu, etc, etc. Nun va facer un desodorante con fragancies trayíes dende la selva virxe y refinaes nos llaboratorios Vichy en París... porque esi productu, de gustar, namái que diba ser asequible pa les persones que lu pudieren pagar (un seutor pequeñu de la sociedá). Al asturianismu pása-y lo mesmo: Plantéguense unes reivindicaciones dafechu ayenes a la sociedá asturiana: Independencia, Autodetermín, República... L'1% d'Asturies, si m'espurro muncho'l 3% pue tar d'alcuerdu con estes coses, pero non la inmensa mayoría. Si ún aspira a facer un proyeutu de país (que non un proyeutu de minoría dientro d'un país) ha d'aspirar a convencer a conxuntu de la sociedá, a la metá más ún, al 60%, al 70%... Y pa ello hai qu'adaptar les nueses reclamaciones a lo que demanda'l pueblu (Que demanda - cuando demanda- coses bien estremaes, como perres, trabayu, ecoloxía...) Poro, ha d'adaptase el mensax, hai que pasar que los temes qu'anguaño son los temes cimeros del asturianismu: Autodetermín, Nación, Llingua. L'asturianismu tien que se mover no que'l pueblu pide y no que-y esmolez que les más de les vueltes ye lo mesmo que-y esmolez a los otros pueblos del Estáu: Trabayu, inmigración, emigración (esto namái que pasa n'Asturies), perres, sovenciones, ayudes económiques... Los 400€ de ZP, l'ayuda de 300€ d'Areces pa mercar ordenadores son les coses que mueven al pueblu, y al pueblu hai que-y dar el pan y el circu que pide, anque na satisfación de les necesidaes que pa esa mayoría son prioritaries (y que pa nós son tamién, masque seyan secundaries), satisfaigamos tamién les necesidaes prioritaries de nueso y qu'al mesmu tiempo seyan tamién d'esa mayoría (anque nella secundaries), como la oficialidá de la llingua. Si ún quier (y en política habría querer) facer política pa un pueblu, nun pue vivir d'espaldes a elli, a les sos demandes... Nun se pue vivir a la esquierda d'IX... porque ya nin IX se pue vivir.
2.- Un productu competitivu: Esto ye el cómo l'asturianismu queda, como productu, arrequexáu nel supermercáu. Bien ye verdá que, como nos best sellers nes llibreríes, podemos entruganos si tamos escaecíos nuna llibrería demientres que PP y PSOE tán espuestos nel escaparate por maldá del vendedor o por crueldá del públicu, y qué foi antes, si la publicidá o l'éxitu... Sicasí, lo que nun se pue facer, si la xente quier llibros d'aventures, ye sacar al mercáu una novela esistencial... Nun ye competitivu l'asturianismu, y la preba ta n'IX y PSOE o PP. Nestes eleiciones hebo un trasvase de votu asturianista a IX y otru trasvase de votu d'IX al PSOE (muncho mayor esti caberu). Un analís curtiu, namái que señalaría nel procesu del votu útil. Sicasí, hai tres d'estes tresferencies de votu un datu a señalar: L'asturianismu namái que ta comunicáu con IX y l'abstención (aínda'l del PAS). Ello ye porque, l'asturianismu ta asitiáu (o vistu) como marxinal nel sistema políticu, averáu a les minoríes (como minoría que ye) y les más de les vueltes d'esquierdes (Cosa rara ye qu'heba una asturina d'esquierdes con estrella bermeya y nun la heba de dreches)... D'esta mientre lo que pasa ye que nun hai una competitividá direuta col PSOE o col PP. L'asturianismu nun ye quien a quitá-y votos a IX (anque lo intenta) pero lo grave d'esto ye que nun ye quien a quitá-yoslos a PP-SOE porque nin lo intenta.
Cuido que nun intentar facer un mensaxe aceutable y tentador pa los votantes de PP y PSOE ye un erru, sobre manera si ún decátase de que ye nellos onde ta'l mayor númberu de votantes y ye a esos votantes a los qu'hai que convencer, porque esos votantes son la mayoría del país, los sos esmolecimientos son los mayoritarios nel país (siénto fadiá-y la ilusión a más d'ún, equí nun hai un PNV nin una CiU mayoritarios) y son nos que se mueve socialmente la xente. L'asturianismu ye incapaz dafechu d'aportar a esa xente que ye la mayoría, y lo más grave de too ye que nun quier facer nada por facelo. (Quiciabes Xuanxosé diga que lo quier facer, pero la falta de renovación y de proyeutu nel PAS lleva a la desmovilización -y pesie a ella ehí tán más de 10.000 votos, que nun son pocos, y son por movese nesi ámbetu)
Una tercera (o cuarta si queremos nomala asina) vía nesti país, ha ser asturianista, y ha ser una vía que seya quien a axuntar a persones de les otres dos (PP y PSOE).
3.- Un productu identificable como talu: Esta ye otra tema importante. Dacuando, l'asturianismu nun ta identificáu como un braeru proyeutu políticu. El movimientu cultural y social pola llingua, necesariu, y necesaria la tresversalidá d'esta clas de reclamaciones, que nun puen vese como coses partidistes, ye mui fuerte, y la so fuercia compárase (instintivamente) cola debilidá d'unos partíos políticos que son mui febles, mui pequeños (y nel so reducíu tamañu ta l'entamu del personalismu que ye la so enfermedá xenética). Los partíos asturianistes (porque debería haber un partíu y grande en comparanza col restu d'asturianistes friquis) nun dan la sensación de querer ganar unes eleiciones: Andecha Astur tienlo dicho delles veces que pa ellos nun ye una prioridá la representación parllamentaria (cosa que ye como dicir que pa un vendedor d'alpargates lo prioritario nun ye vendeles); Unidá presentóse a unes eleiciones nes que nun quería ganar (lo probetayo de la campaña, la mierda video que fixeron, el pocu énfasis que punxeron nella...) facer eso ye facer más en contra d'ún mesmu qu'al favor... Ún nun pue ilusionar si nun creye'l so propiu discursu, ún nun pue querer qu'otros s'enfoten nelli cuando él mesmu nun fai un res por ameyorar la so situación.
Nun ye almisible qu'heba partíos asturianistes que vaigan a les eleiciones nun queriendo ganales o nun queriendo siquiera facer campaña nelles...
Bono, pel momentu esto ye lo que se m'ocurre alrodiu de la diferenciación del productu. Otru día si eso, analizaré les similitúes ente'l Xuan Xosé del escañu y la Rosa Díez d'anguañu, que nun son poques (ex-socialistes, atroparon votu socialista y popular, un programa mui paecíu al de los grandes pero estremáu no identitario (una nun sentíu otru notru)... Per ehí van los tiros, per ehí foron, per ehí van-yos a los españolistes d'UPyD y per ehí deberíemos tiralos nós si queremos facer daqué... ¿O nun queremos?
Tags: analís asturianismu
Esbilla | 
del.icio.us
Ta mui prestosu tou nel blogue, agora toca trabayar y plantegar l'escenariu nel que nos atopamos angüañu.
¿Porque dicir asturianista y non nacionalista?. Los catalanes falen de catalanismu pero tamien d'independentismu.
El discursu que se propon, ¿en que se diferencia del d'IX? ¿podria dar resultaos?
Esiste fobia a considerar Asturies como nación, y decilo. ¿creemos nello?
Porque se marcan unos estereotipos como nocivos (nación, llingua, autodetermin) y en cambiu'l 6% de l@s asturianos coinciden en nomar l'estatus políticu d'Asturies como Nación. Porque los partios,coaliciones nacionalistes nun algamen más del 0,31% votos nes estatales.
¿Porque se quier llegar al electorau del PSOE e IX cuando nun atropamos el nueso? ¿Porque entamar la casa pol teyau?
Si vamos a porcentaxes (menciones el 6%), el 60% d'Asturies ta al favor de la oficialidá...
Lo que quiero dicir con esto ye qu'una cosa ye lo que tu consideres un fechu (o una necesidá) y otra cosa la prioridá que-y das.
L'eleutoráu asturianista, paezme, ye un eleutoráu nel que la oficialidá ye una prioridá de primer orde, pero, al empar, coses como la nación o la independencia nun son una de les prioridaes... ERC diose un fostiazu del 15 por basar la so campaña na independencia, ¡¡Y tamos falando de Cataluña!!
Coses como Independencia o Nación, a la xente, al 99% de la xente nun-y da más, nun ye pa ella una prioridá... Pues facete la entruga al revés, si'l 6% considera a Asturies una nación... ello ye que'l 94% considera una nación a España... y per contra, nun voten a partíos nacionalistes (PP, IX y PSOE son españoles, pero, sacantes el PP, nengún basa la so campaña nes gories de la "nación española"). Lo que digo, una cosa ye lo que tu consideres (énte esa entruga nun te queda otra que dicir si la nación ye Asturies o España) y otra la prioridá que-y deas a eso. Yo puedo dicir nuna encuesta (y diré si teo la oportunidá) que m'esmolez el mediu ambiente, pero nun voi facer el mio votu neso, pa min ye daqué secundario...
Hai qu'aprovechar, cuido yo, les voluntáes que tán latentes nel pueblu... el 99% de los asturianos siéntese asturianu, un porcentaxe mui grande y mayoritariu siente dalguna clas d'amor por Asturies...
¿¿¿Por qué emperrase nun mensaxe que nel meyor de los casos, manexáu a la perfeición (cosa que nun va pasar, porque la perfeición ye teórica) aportaría al 6% de les persones???
Lo que yo propongo ye un partíu nacionalista que seya nacionalista pero que nun lo diga, y que sobre manera, sepia dir per onde la xente quier, falando a la xente d'Asturies (y non de nación asturiana), de paru (y non d'independencia), d'inmigración, de llingua, d'identidá (pero non d'auto-esclusión del estáu), d'emigración, de vivienda, de bientar...
El discursu que propongo, diferénciase del d'IX en bien de coses: Porque ellos ttamién tienen los sos mitos y los sos lllastres, y hai bien de coses que-yos quiten votos: La postura acrítica pa cola inmigración, la postura ciarrada y acrítica pa con Palestina y la conderga a Israel, el so enfotu en sofitar al dictador cubanu, la república (otru mitu que tien IX igual que'l nacionalismu d'esquierda)... Eses coses quíten-yos votos, eses y les engaradielles internes, caro, pero eses coses que son parte esencial d'IX y qu'hasta apaecen nos anuncios eleutorales desvíenlos de lo que la xente quier que ye básicamente tener el banduyu enllenu y eses coses: Trabayu, vacances, y eso...
Ye ehí onde s'hai que mover y non nun romanticismu anacrónicu col que tu o yo podemos tar d'alcuerdu, pero que nun-y diz nada al 99% d'Asturies.
Mui bona reflexón. Fai tiempu que yo tamién pienso lo mesmo, a la fin, los partíos asturianistes o nacionalistes o como queramos nomalo, sólo convencen ya intenten convencer a los que yá tán convencíos, ye namái qu'un círculu d'autoafirmación perpeligrosu.
Paezme un razonamientu interesante, pero qu'en parte nun se difiere del miu.
Falar de nación y autoafirmase como tal nun difiere de la prautica política que se desendolque, per un llau ta'l plantegamientu identitariu y per otru la base p'algamar un tipu de sociedá nel que temos más a gustu.
Falar de paru, vivienda, inmigración-emigración, mediu ambiente,... tien de tener una base sólida, nel casu de los partios-coaliciones nacionalistes dende la izquierda, según se ve. Esti trabayu tien de ser constante y codu a codu cola sociedá asturiano. Faciendolo bien y con una base programatica nidia ye la forma de facer solombra a los grandes partios estatales.
Ser nacionaliegu (y d'izquierdes) y ocultalu paezme un tremendo erru, ya que'l mensax que llevamos entos nun se va dixebrar nidiamente del de por exemplu IX (que tamien tien nacionalistes en su coalición, pero nun lo dexa asomar la tiesta, salvo pala semeya). Hai formes intermedies de plasmar un bon trabayu na sociedá asturiana nel día a día, nos conceyos, nes plataformes, na cai y plasmar realmente lo que son sin avergoñarse d'ello.
ERC baxo'l so númberu de votos por munches coses pero la más bultable xuntase col PSC, ye lo mesmu que-y pasa a IX cá vegada que gobierna col PSOE (Xixón, Avilés,...). Agora ERC va facer un congresu onde se va discutir que llínea política van llevar alantre los prósimos años (Carod-Rovira o Puigcercos).
Prestariame que los partios nacionalistes algamaren el 60€ del electorau que ta pola oficialidá, pero primeru tienen d'algamar el 6% pa polo menos tener una base sólida onde poder medrar.
Agora mesmu l'asturianismu como tal,ye cultural y hay-lo en casí toos los partios políticos presentes n'Asturies.
Paezme un razonamientu interesante, pero qu'en parte nun se difiere del miu.
Falar de nación y autoafirmase como tal nun difiere de la prautica política que se desendolque, per un llau ta'l plantegamientu identitariu y per otru la base p'algamar un tipu de sociedá nel que temos más a gustu.
Falar de paru, vivienda, inmigración-emigración, mediu ambiente,... tien de tener una base sólida, nel casu de los partios-coaliciones nacionalistes dende la izquierda, según se ve. Esti trabayu tien de ser constante y codu a codu cola sociedá asturiano. Faciendolo bien y con una base programatica nidia ye la forma de facer solombra a los grandes partios estatales.
Ser nacionaliegu (y d'izquierdes) y ocultalu paezme un tremendo erru, ya que'l mensax que llevamos entos nun se va dixebrar nidiamente del de por exemplu IX (que tamien tien nacionalistes en su coalición, pero nun lo dexa asomar la tiesta, salvo pala semeya). Hai formes intermedies de plasmar un bon trabayu na sociedá asturiana nel día a día, nos conceyos, nes plataformes, na cai y plasmar realmente lo que son sin avergoñarse d'ello.
ERC baxo'l so númberu de votos por munches coses pero la más bultable xuntase col PSC, ye lo mesmu que-y pasa a IX cá vegada que gobierna col PSOE (Xixón, Avilés,...). Agora ERC va facer un congresu onde se va discutir que llínea política van llevar alantre los prósimos años (Carod-Rovira o Puigcercos).
Prestariame que los partios nacionalistes algamaren el 60% del electorau que ta pola oficialidá, pero primeru tienen d'algamar el 6% pa polo menos tener una base sólida onde poder medrar.
Agora mesmu l'asturianismu como tal,ye cultural y hay-lo en casí toos los partios políticos presentes n'Asturies.
Lo que ta claru, ta claru...
Nun poemos siguir asina, nun poemos dexar que los mesmos de siempre desendolquen los sos proyeutos sin un mínimu de ganes per camudar la situación, salir del pozu la marxinalidá y lluchar por algamar obxetivos, medrar y llevar les nueses reinvindicaciones de la cai a les instituciones publiques. Idees como la xuntanza de l´asturianismu politicu nuna coalición de minimos o la plataforma civica Asturies Ciudadana yeran un entamu pa construir conciencia, proyeutu y sofitu ciudadanu.
y yá visti como quedamos los qu'entamamos lo d'Asturies Ciudadana... unes propuestes tan cencielles como facer una coalición de toos y escoyer al cabeza de llista en primaries abiertes...
Pero hai muncha incapacidá...
Munchos cabos sueltos y poca voluntá d´atalos d´una vegada y el fantasma de l´UNA alrededor, aparte de la falta de renovación de dellos cabezaleros como Xuan Xose que fueron una torga perimportante. Sin escaecer a infiltraos del PP, como nun dexen de ser l´Uras, drecha española que colaron pa montar el so chiringu propio, independiente de Génova y que disten muncho de les bases del PAS y l´asturianusmu politicu, conceyales d´Uras escontra l´asturianu, ta too dicho.
Tantes torgues, tantes muries, problemes, prexuicios, personalismos, estu ye l´asturianismu amigos.
Onde te´l mio tíu Valledor rotulando n´asturianu que se quiten toos! xD
El problema igual ye qu'IX tien Valledores que valen muncho y tamién tien los sos propios españolistes... Porque ñégome a pensar que tol españolismu d'IX tea agora n'ASCIZ...