Microanálisis
Voi parar colos análisis políticos un cachu y voi centrame en daqué no que toos podemos centranos dende la condición y parte d'un movimientu social que ye'l primeru n'amplitú, n'hestoria ya implantación social.
Nun hebo movimientos sociales n'Asturies enantes del de la llingua (sacantes quiciabes l'obreru si ye que lo ye) y estes son les razones poles qu'esti movimientu va faciendo camín al andar, hebo erros, hebo aciertos (PAS+UNA), rectificaciones (recordái l'asturianu de los 80) y bien de coses y cambios d'estratexa (A lo último óptase pol lobbysmu dende Caveda y Nava y coses d'eses, más que na aición frontal).
Sicasí, nun voi entrar a analizar los llogros (o fracasos) del movimientu social organizáu, sinón a plantegar entrugues sobro los llogros (o fracasos) del movimientu INDIVIDUAL pa col asturianu. Lo que m'entrugo ye:
¿Qué pasa que les más de les veces nun somos a convencer de la importancia de la llingua/factores identitarios a la nuesa propia familia?
¿Qué pasa que fora de "la tribu" vente como un friqui -que non un llocu- (un friqui nel sentíu de que yes minoritariu, anque nun yes l'únicu) por tar con esi tema del asturianu? Y falo de xente d'Asturies...
¿Qué pasa que nun somos a esparder un sentimientu neutru políticamente como ye l'asturianismu, que lo mesmo pue adoptalo ún d'esquierdes que de dreches, anarquista o de centru...? ¿Por qué una "marca blanca", daqué que nun entamu nun tendría mayor problema n'aportar a la xente nun apuerta?
Yo doi estes posibles rempuestes (vós veréis si tais d'alcuerdu o non):
A) Nun sabemos vender el mensaxe, ciarrámonos muncho sobre nós mesmos y nun facemos por averar l'asturianu a la xente.
B) Nun tenemos coherencia, dicimos que l'asturianu ye la llingua propia (o nacional) etc etc, pero depués enl médicu, en trabayu etc. etc. aselamos y adaptámonos y nun facemos un emplegu perdominante d'ella, arrequexándola a dellos actos en cuenta de facer por vivir n'asturianu... (Colo que convertímonos nunos hipócrites y facemos lo que criticamos)
C) La pluralidá y les engarradielles internes dientro'l movimientu social (y políticu) causen un sentimientu de refuga y la xente que podría implicase nun s'implica abondo na tema. Ye dicir, nun nos ciarramos, pero la imaxe de desunión perxudícanos.
D) La xente ye tonto/Nós somos friquis (rempuesta fácil)
Tags: llingua
Esbilla | 
del.icio.us
Pues un poco de too, pero cuido que nun ye too tan escuru como lo pintas. Paezme que nos trenta años últimos hebo avances neso de la concienciación y, sobre too, na consideranza de l'asturianu como una realidá que tá ehí. Cuido, y ye una opinion personal, que llegar al lobismu (Caveda y Nava) ye un pasu grande porque nun hai frente que dexar ensin cubrir. Too pasa, a tou gochu-y llega'l Samartín, y d'equí a diez años veremos. Mesmo que'l friquismu ya ye cultura popular, l'asturianu sedrá oficial ;)
Un problema importante, nes condiciones específiques asturianes, ye la falta d'un encontu políticu que contribuya a tirar del carru reivindicativu. En trenta años nun fuimos quien a iguar una formación política con implantación social y presencia nel másimu muérganu institucional (Xunta Xeneral). Esto fai que l'esfuerzu pa llograr oxetivos seya mayor y el tiempu necesariu pa ello más llargu. Y too apunta que pal futuru nun van variar muncho les coses.
Toi d'alcuerdu colos dos... y podíemos quiciabes dar por válida esta fras:
"L'asturianismu triunfó por KO na música, ganó na lliteratura, medró na sociedá, aínda nun lu derrotaron nel enseñu, caltiense nos medios de comunicación y perdió por KO na política"
El balance ye ambiguu, polo xeneral nun hai nin tantes lluces nin tantes solombres como pensamos, y duelme pensar (porque lo pienso) que nos próximos 10 años la cosa va siguir igual, o si acasu ganarémos otru espaciu los sábados y los domingos de 5 minutos n'asturianu na RTPA.
Hai tres frentes abiertos onde hai que ganar sí o sí: Alministración (oficialidá), RTPA (programación) y Escuela (Llingua vehicular de dalguna asignatura - ye dicir, del asturianu non sólo estudia LU sinón estudiar EN)