Una de les coses más cafiantes de la esquierda (y de parte de la drecha) que por desgracia empapóse bien d'ella l'asturianismu políticu y cultural, y la sociedá asturiana en xeneral, ye esi enfotu nes instituciones y la xera del estáu/alministraciones públiques p'avanzar.

Nun digo yo que nun seya necesario qu'actúen les alministraciones, ye evidente que sí, ye evidente qu'han declarar la oficialidá, qu'han sovencionar la lliteratura, qu'han dar clase d'asturianu nes escueles, qu'han facer una RTPA dafechu n'asturianu etc, etc.

Pero ello nun quier dicir qu'heba que s'enfotar namái que na alministración. Si nun somos cuatro friquis, y somos una minoría curiosa, tendríemos que desendolcar les ferramientes afayadices pa promocionar l'asturianu y la cultura asturiana al marxe de les alministraciones. Un bon exemplu d'ello ye Radio Sele; que furrula namái que col trabayu desinteresáu de la xente que ta nella; otru exemplu son los milenta blogues como esti polos que naide nun paga (de xuru qu'a daquién se-y ocurrió pidir sovención pol blogue); y otru exemplu diba ser la Uiquipedia, magar qu'a esto cuasi que naide-y dedica un migayín del tiempu d'él. Que yo sepia, amás de min mesmu dacuando, ún de los Hermanos González y Vity, propietariu de Fueya en Blancu son de la poca xente que trabaya nello.

 La noticia, o'l bilurdiu quiciabes, d'una nueva publicación diaria de noticies n'Asturianu qu'anunció Asturnews yera un bon entamu, nun sé si aquello quedaría pa prau y nun pasó de bilurdiu o verdaderamente van velo los nuesos güeyos... Yo creyo qu'hai bien de persones dispuestes a sofitar esti tipu d'iniciatives, y qu'ente toos, podemos entamar un periódicu, una radio o una TV casera si mos apetez... Podemos enllenar la rede de power points, como dicíen, o podemos enllenar el youtube de videos y fricaes, dende parodies de Camín de Cantares a la Marquesina pasando pelo que se vos ocurra...

Dicía un cabezaleru d'Andecha que facía falta militancia (normal), pero, cuido yo, fai falta tamién militancia cultural, militancia fora de lo que son los partíos y asociaciones polítiques; fai falta la militancia del llector, la del uiquipedista, la del qu'entama un proyeutu d'estos, la del que traduz l'ubuntu, la del que fai el Firefox n'Asturianu...

Ye d'esti mou, pasu ente pasu, como van algamándose les coses, pocoñín a pocoñín; vamos dexar de llau'l comunitarismu y entamar a facer estes coses, que son les que fan país, adulces, pasu ente pasu...