Ponéivos embaxo'l carru, que pasarávos perriba...
Daquién pue pensar qu'esta ye una mala noticia. Pero enquivócase. Nun quita nin una migaya del optimismu d'ayeri, porque magar que seya una noticia mala pa la llingua, nun ye relevante.
Nun dexa de ser llacerioso que 71 persones tengan el poder pa decidir sobre una carrera, sobre una llingua (opúnxime y opondréme siempres a l'autonomía universitaria, daqué qu'esplicaré dalgún día). Pero nun son nada. Son 34 votos, 34 persones... ¿Pero qué persones? Nun son eses 45 persones que representen a un millón d'asturianos y siéntense na Xunta Xeneral, estes, a lo más, representen a 1000 persones del ámbetu académicu y paezme que toi pasándome cola cifra. De toes maneres, al que nun-y convenza esti argumentu, nun tien más que ver qué defendíen los dos candidatos a rector (paezme que los cuatro: la carrera) que ver que nun hai carrera güei pero tampoco habíala ayeri... Qu'Asturies vivió y vive ensin una decana pro-llingua y nun pasa nada.
El cambeu del que falé ayeri, sigui, ye ayenu a una institución como la universidá (a la que-y ñego la mayúscula); les semeyes siguen, los miles de persones que dieron la cara ehí tán, les enmiendes al congresu de la FSA siguen enriba la mesa, la xente asturianista del PP tamién, la mayoría silenciosa que llevanta adulces la voz pol asturianu nun dexa de medrar y de tomar concencia, el cambeu avanza... Tamos nun procesu hestóricu, díxilo ayeri, y nos procesos hestóricos hai tensiones, avances y retrocesos... Hébolos na Revolución Francesa (que de xuru estudiaríeis) pero por munchos "Girondins" qu'heba, por munchu reaccionariu sueltu, el cambeu sigui. Ye'l "We the People", de los padres fundadores, nós el pueblu, non ellos los profesorucos refa, porque'l suxetu hestóricu somos nós y por muncha élite que se llance embaxo'l carru el carru va siguir demientres que la xente puxe per él...
Nun hai que se rendir. Nun hai motivos, somos un pueblu en movimientu y nun mos da más lo que 34 persones que nun se representen más qu'a sigo mesmes digan, 34 persones que nun tienen más méritu o llexitimidá que'l facer una tesis y sacar un puestu na universidá. El cambeu ta faciéndolu'l pueblu, la xente. "We the People" y non 34 profesores refalfiaos, 2500 semeyes en www.doilacara.net son más que 34 profesores amargaos. El Yes We Can ta vivu, y Ana Cano -anque agora nun seya decana- sigui faciendo parte d'él.
Esbilla
del.icio.us
Que yes mui mozu y qu'aínda sabes poco de la vida y de la historia del asturianismu rescampla tolos díes nos tos escritos. Pero lo d'esti y el d'ayeri ye yá'l summun. Espabila, guah.e -y dígotelo con bon tonu- qu'esto ye'l mayor h.achazu pal espoxigue de la llingua asturiana dende hai polo menos 20 años, un h.achazu qu'esbarrumba tol llabor científico fecho na Universidá, condergando al estudiu de la llingua al escurantismu (y a los profesores que lleven bien de tiempu desendolcándolu), afitando'l buenismu y la ultraderecha na Universidá y que dexa tremando a tol sistema educativu asturianu (n'Asturies tovía hai un Área d'Educación que ye Llingua Asturiana y la Universidá yá nun va formar esi profesoráu, poro...).
¿Cambéu? Yo trabayo na Universidá y el clima equí, ente funcionarios y profesoráu (asturianu y non asturianu) ye dafechamente foscu y agresivu hacia la llingua y quienes la defendemos dende dientro. Quieren, lliteralmente, esborriámos del mapa.
La rempuesta nun pue ser enxamás esi optimismu fatu y ciegu del que tu fales (tán masacrándomos) sinón d'insumisión intelixente y de llucha comprometío y serio polos derechos civiles y pol conocimientu. Nun ye una llucha que se gane sonrisando.
embaxador tien razón. Lo de Filoloxía ye una putada pero nun ye nada raro. La igualdá de fueces ente antiasturianos y asturianos siempre foi clara. Ye más, lo de Filoloxía pue ser grave pero tamién irrelevante. La custión llingüística nun va iguase na Universidá. Iguaráse onde correspuende, que ye nel planu políticu. Cuando nel planu políticu les coses seyan normales, los paletos de Filoloxía que tán contra l'asturianu perderán el culu pa camudar de xaqueta.
Con tolos mios respetos, xurde, pémeque que'l movimientu cultural tien, hasta'l momentu, algamao abondo más que'l políticu no llingüístico. Si dependiéremos de votos, mal díbemos.
El problema ye qu'un gráu de Filoloxía Asturiana diba ser un sofitu llegal pa la oficialidá delantre del Tribunal Constitucional, y esi ye l'argumentu de los opositores -dixéronlo na Xunta asina de claro- pa torgalu.
Amás, diba ser un espoxigue pa la llingua nos estudios científicos, nel prestixu social, como enxamás se viera n'Asturies. El títulu diba sacar decenes de mozos al añu a la cai, a Asturies, siendo estudiosos de la llingua, siendo bonos profesionales preparaos pa usar y defender el so conocimientu en tolos niveles (incluyíu'l políticu y l'educativu) lo que diba a representar un motor de cambéu social perimportante. Eso ye lo que se ta torgando (amás de tirar embaxo tol trabayu de profesionales como Ana Cano, Xulio Viejo, Ramón d'Andrés, Roberto González-Quevedo, etc etc, dende dientro de la Universidá...
Y falando de paletos, mirái estos comentarios:
http://www.lne.es/secciones/noticia.jsp?pRef=2008062500_46_650439__SOCIEDAD-Y-CULTURA-Filologia-Oviedo-suprime-Asturiano-decana-Cano-dimite
Na universidá hai munchu asturianista de moqueta más preocupáu en nadar y guardar la ropa que d'otra cosa. Y nel mundu de los intelectuales asturianos lo mesmo. Dientro de la formación pa los profesores d'asturianu tán regalándose títulos a xente que nun fala una pallabra nesta llingua y que, pa detrás, ríense de los compañeros que la utilicen. Y esto nun ye un llevantu, que quede claro. Pue tenese mieu a salir a pescar con mal tiempu, a subir a un andamiu, baxar a un pozu o pasar 8 hores delantre un ordenador hasta que te queden los güeyos fosforescentes. Pero que la comunidá universitaria que ta pola llingua ande acuruxada ye de traca. ¡¡Facéivos valer, rediós!!.