Asamblea Asturiana
L'ALLA va convocar una asamblea, y véolo bien. Ye una asamblea na que van tratase tolo que cinca al tema de la llingua, pero l'ALLA nun va (nin pue)impulsar una de les soluciones que se faen más necesaries agora: La vía política.
L'ALLA ye una institución apolítica, y ha siguir siéndolo (y esperemos que lo siga siendo) y namái que tien que mirar pol idioma... sicasí, faise preciso facer daqué, un proyeutu políticu, que nun pue salir de negociaciones ente paisanos vieyos y con canes y caciquinos d'andar per casa que remanen nel so corripiu-partíu a voluntá... Faise necesariu entamar un CONGRESU POR ASTURIES. Una "New Politic", un actu fundacional, abiertu a tolos sensibles col idioma y l'autonomía, col idioma y la democracia y colos drechos civiles...
Faise preciso un 4u partíu, porque la non-politización de la llucha, porque'l llobismu llevó a que PP y PSOE ventilen nuna tarde, en 4 hores l'artículu 4... Nun podemos permitilo, nun podemos dexalo pa prau, y nun mos queda otra qu'entamar la vía política: Una vía política seria, una vía política que tresforme asturies, dende la tresversalidá propia d'un movimientu social, pero creando un partíu pal movimientu social. Tenemos que ser al asturianu y la oficialidá lo que foi daquella IU a la OTAN, tenemos que ser facer "EL PARTÍU", l'únicu, aquel que con dicir "el partíu" toos saben de quién falamos, un partíu abiertu, con sensibilidaes, con ideoloxíes diverses, como un BNG como una asociación abierta a la drecha y a la esquierda, axuntada na xera de facer d'Asturies un país meyor, de da-y drechos a la so xente, a la so llingua... quiciabes de separtase n'algamándolo, quiciabes de separtase más sero... Pero hai que lu facer.
Quiero, queremos munchos, un partíu nuevu, pero non un partíu más. Nun pue ser un partíu más, tien que ser otra cosa, tien que tar nél tol mundu, tien que se meter nél tolos partíos, un CAO políticu, un partíu de partíos, la Coalición d'Asturies, el FRENTE ASTURIANU... Ye esti'l camín, ye esto lo que necesitamos, y pa facelu, o namás que pa falar, que nunca ta de más ente xente que trabayamos no mesmo, faise preciso facer un gran conceyu, una gran asamblea o congresu fundacional abiertu a toos....
Esperemos que l'asamblea de l'ALLA valga pa que la xente vaiga a por una segunda asamblea, l'asamblea de la política, la hora d'acabar con esta comunidá autónoma enllamuergada y trabayar pola Asturies que queremos los asturianos que nin ye estáu nin ye república (otra cosa lo individual de cadún)... pero tampoco ye provincia nin la puxarra que mos quieren dar...
Tenemos que ser a esti estatutu lo que foi Luther King a les lleis raciales. Tenemos que ser a esti país lo que Ghandi a India, tenemos que ser a esta llingua lo que'l rock a la música. Tenemos que facer camín, y el camín tien que ser anchu, llargu, que nél podamos tar toos, que nél nun quiera sobresalir nengún, porque pa xugar a la política, pa tener poder, pa remanar al gustu d'ún, pa sentase nel escañu y pa lluchar con arte pol protagonismu y la sonadía yá habrá tiempu depués...
Agora nun hai tiempu pa xugar a la política, hai tiempu pa baltar con ella, pa mandar al infiernu la vieya política qu'amataga a esti país y pa facer la nueva Asturies pola que naguamos... Esperemos que se faiga... porque de nun facese bien poco podremos esperar.
Esbilla
del.icio.us
Política-ficción otra vegada, bien plantegada como siempre, pero irrealizable.
bardio xugando a la política 2.0.
Los de la derecha, garrái a XX y toos pal PP con pilarina pardo.
Asturies nun necesita más lliberales.
esquierda y asturianista pa ocupar l'espaciu d'iu: esa ye la solución...y si fae falta col apoyu de l'academia.
Una fesoria que nun sirve pa facer riegos nun val. Unos fierros que nun valen pa cabruñar meyor dalos pal rastru. Un barcu enllenu furacos meyor entonchalu nel sable... unos partíos asturianistes-nacionalistes que nun valen nin pa convocar acciones contundentes contra l'insultu estatutariu que nos acaben d'aventar nun val la pena nin votalos, nin apoyalos nin tenelos en onsideración. D'alcuerdu del too contigo na vía política. Ye lo que nos queda. Pero entamando por daqué nuevo (xuntanza de fuerces o non ye otru tema). Lo qu'hai a min como ciudadanu asturianu nun me sierve pa nada n'absoluto.
A ver neninos, sois como politiquinos de chigre pero ensin el chigre...
Prestaría saber qué faceis realmente caún por Asturies y pola so llingua más que teorizar políticamente "sobre lo bien que taría(...)". Non, la política ye otra cosa y pa camudala hai que trabayala. El rapaz esti de la llingua a pacer, yá combayó con Unidá, con Izquierda Xunida y cola URAS-PAS, ¿qué se pue esperar de daquién asina?. Los únicos 2 referentes qu'apaecen nesti blog sobre'l so trabayu son la fricada esa d'Asturies Ciudadana y la otra fricada de resucitar el Conceyu de Madrid con 4 amigos...
Lo de ser emigrante forzáu pesa munchu, pero nun mos deas más la vara colo qu'hemos o nun hemoss facer.
PD:Xanu, pos lo qu'hai ye lo qu'hai, habrá q lu reformar, entra y camudalo dende dientro, Andeches, Unidaes o Pases, pero facéi dalgo por dios.
Esto ye la materialización del nuesu drechu a espatuxar, más nada. La xuntanza qu'organiza l'ALLA'l xueves da más tristura qu'otra cosa. Una xuntanza nun auditoriu, con turnu de pallabra pa tolos asistentes, cuando los fechos merecíen una revuelta popular na cai. De pena. Esi actu va servir namás que pa llambenos les mancadures ente toos y yá de pasu chupar dalgún pirulí.
D'alcuerdu con qu'hai que construyir una alternativa política. Pero lo del xueves más paez el típicu actu de la secta que se xunta pa esperar la fin del mundu.
Mmmmmmmmm L'Academia otra vez llevando la iniciativa en cuestiones politiques y tolos corderinos detras. Aqui ya se sabe quien manda. Menudu papelón pal CAO eh? que quedo embazau cola noticia del articulo 4 y agora tien que chupar rueda desta Academia tan espabilada y tan rara que fai asamblees polítiques abiertes nes que nun hai pitu que tocar.
Damos puta pena.
Al llistu esi que fala diciendo si yo combayé o non con A o B, dici-y que yo voté UNA nes autonómiques y IX nes estatales, y pel momentu nun m'arrepentí de nengún de los dos votos nin veo incompatibilidá dala en votar Unidá nes autonómiques ya Izquierda Xunida nes xenerales...
Si volviere nel tiempu volvería a facelo y si daquién quier que-y lo esplique nun teo nengún problema.
Tocantes a lo d'A-C, efeutivamente, foi un fracasu, pero nun dexó de ser un intentu (Ún pue tener mala suerte pero a lo menos féxolo ¿non?), y tocantes al conceyu en Madrid, he dicite que tamos medrando y que vamos facer campaña n'Ochobre. Yo nun sé si hai munchos o pocos nacionalistes asturianos en Madrid, lo que vamos facer n'Ochobre ye facer por pañalos.
Tu, que tantu fales de trabayu, bien podíes firmar col to nome verdaderu y facenos una amuesa del to "Curriculum pol asturianu/por Asturies"...
Pero la cobardía ye mui guapa p'atacar dende ella.
l´Academia dempués de normativizar l´asturianu y puxar pol desendolcu d´una nueva lliteratura (llabor que yá nun-y correspuende, ente comines, yá que la lliteratura n´asturianu yá ye una realidá afitada), ye defender los drechos llingüísticos de los asturfalantes, y ensin oficialidá nun hai drechos llingüísticos. La oficialidá nun ye una cuestión politica, ye una cuestión de drechos humanos a la que-y tienen que dar rempuesta los políticos. Y l´Academia tendrá que tar, yá que nun ta l´alministración, puxando pola llingua como institución cimera de la llingua que ye.
Meyor taba Ana Cano enmierdando ya insultando pelos blogues (agora que nun hai foros) que lluchando polos nuesos drechos, non?
Si que damos puta pena, gracies a unos cuantos...