La llucha nacional y l'asturianu mediu
La llucha nacional asturiana nun ye escontra "l'estáu colonial", nun ye escontra España nin el pancastellanismu que ta asitiáu nesa ideoloxía, que ye portadora d'actitúes y valoers resgresivos. Ye una "guerra civil".
Güei lleí n'infoasturies (www.infoasturies.net) una noticia sobro'l país vecín, que dicíen que'l BNG aconceyó a 25.000 persons nuna manifestación pol estatutu de nación pa Galicia... Equí, frente a eses 25.000 (Ta bien, vamos rebaxar la cifra si vos apetez, dexámoslo en 15.000 ¿Ta bien?) Frente a eses 15.000 persones (o 6.500 n'equivalencia pa nós, porque Asturies tien daqué menos de la metá de población) lo más qu'aconceyamos pal día de la patria (o'l 25 de mayu, según gustos) debieron ser 100... y toi diendo mui perriba.
Si en cataluña o'l País Vascu, el presidente nacional pue falar y fala en nome de los catalanes o de los vascos, ye porque tres d'esi presidente nacional hai una nación que "encumólu" ellí. Hai una nación que determina unes coses, y hai unes polítiques nacionales... Asturies nun ye una nación, ye una nacionalidá, ye una nación-cultural; pero fálta-y ser nación política, como sí son Euskadi y sobre manera Cataluña.
Los políticos catalanes preséntense en Madrid con unos pidimientos nacionales, que sofiten PSC, ERC, CiU ya ICV... y yá si queréis quitar a ICV o PSC d'esta llista,c osa que nun veo, porque son partíos qu'arrespuenden a intereses nacionales catalanes masque tean en coalción con otros del estáu, siguen siendo mayoría. Los catalanes conformáronse como nación política dende la II República, reafírmense como nación política eleición tres d'eleición y pel momentu ye eso lo que tresmiten y pueden culpar a España de tolos sos males...
"Los catalanes enteros diximos A, si ye B, la culpa ye d'España"
Daqué asemeyao, anque non d'una cohexón tan grande como la catalana ye lo qu'asocede nel País Vascu, que ye una nación política anque nun tea tan bien integrada como la catalana. Galicia, ta camín d'eso y ta nun puntu mediu... pero nós non.
Por exemplu, si un catalán nun tien un modelu de financiación propiu, ye porque-y lo torguen en Madrid, si nós nun tenemos la oficialidá ye porque'l nuesu pueblo tórganoslo nes urnes. Bien ye verdá que podemos almitir munchu "enemigu", "españolón" y tolo que queriáis nesi 80-90% que vota PP-PSOE, pero nun vais ñegame que l'asturianu mediu, esi que nun 56% de los casos unvía a los guah.es a asturianu, que fala amestáu y que vive en xixón o una villa de tamañu mediu, vota a esos partíos...
L'asturianu mediu ye la nación, escaecer eso pue llevanos a escenarios de política-ficción y a querer culpar al españolismu de los nuesos males. Cataluña, de votar agora, nun votaba la CE, Euskadi nun la votó, pero Asturies votaríala una y mil veces... Esi ye'l problema, ye por eso que l'asturianismu fracasa, porque pretende ufiertar un proyeutu qu'estrémase en mui poco del proyeutu qu'ufierten los nacionalistes gallegos, catalanes y vascos.
La mayoría de los blogueros, tamos d'alcuerdo con esi proyeutu, la mayoría de los blogueros quixeremos ver d'Asturies una GAlicia "a l'asturiana" una cataluña "a l'asturiana" o un País Vascu "a l'asturiana"... Pero l'asturianu mediu non, y ye'l sector mayoritariu de la población.
Nel sieglu XX había notables, y nobles, pero lo que más había yera xente normal, xente obrero o xente trabayador... con riegles democrátiques y tresparentes, imposible yera qu'esos partíos de notables ganaren unes eleiciones o foren quien a condicionar unes eleiciones. O ceden un pocoñín y averen los intereses d'ellos a los de la xente, y entós deveníen en partíos conservadores, o queden arrequexaos al 2-5%. Al nacionalismu asturianu pása-y lo mesmo, tán faciéndose polítiques pa esi 2-3-4-5% de la población, esi 2-5% de la población que diz qu'asturies ye una nación... Tamos viviendo al marxe del 95% de la sociedá asturiana, tamos intentando facer un proyeutu que, nel meyor de los casos, diba ser hexemónicu nel 2-5% de la sociedá (y nun lo ye, Andeches, FAI's, UNA, PAS y demás encárguense d'ello)...
A min convénceme'l proyeutu d'UNA. Lleo'l programa y decátome de qu'esi programa ye'l que quiero p'Asturies... El problema ye que l'asturianu mediu non.
¿Quién ye esi asturianu mediu? Un desconocíu pa nós. Y ye a él a quien hemos convencer de que tenemos la razón y hemos "llevar al güertu" pa ganar unes eleiciones o siquiera sacar representación. Vais decatavos de lo estremáu que ye l'asturianu mediu de vós mesmos...
L'asturianu mediu nun vio na vida la wikipedia asturiana, l'asturianu mediu nunca nun entró n'asturies.com, nin n'asturnews... menos tovía n'infoasturies.net o glayíu... A lo muncho de Les Noticies debe saber qu'esiste, pero na vida pensó en mercalu. L'asturianu mediu nun llee n'asturianu, tolo más tien un llibru n'asturianu per casa, al Asturianu mediu présta-y pola vida ver un partíu de fútbol de la seleición española, nun piensa qu'heba peligru de qu'España tea frañando, nin piensa qu'Asturies ta desaniciándose, lleva la bandera, bebe sidra, escancia bien, pero nun fala asturianu... Nun escucha a Nuberu, nin a Esther Fonseca, nin a Corquiéu, muncho menos a Dixebra... présta-y más Victor Manuel, Melendi y pásalo de muerte viendo una carrera de Fernando Alonso.
L'asturianu mediu nunca nun foi a una manifestación pola oficialidá, anque nun-y presta que l'asturianu desapaeza... (y esta ente toles preocupaciones, nun ta nunca ente les 5 primeres). En verdá sacantes les de la guerra d'iraq tien dío a bien poques manifestaciones. L'asturianu mediu manda a los guah.es a llingua asturiana, pero depués nun-yos merca llibros n'asturianu nin fai nada porque deprendan nada fora de lo que ye l'asignatura. Esmoléce-y el paru, la economía, les infraestructures, la sanidá y l'enseñu...
L'asturianu mediu siempre ganará les eleiciones, porque por cada asturianista como tu o como yo, hai delles decenes d'Asturianos medios. ¿Qué futuru tien un proyeutu que fai de la nación la so bandera cuando l'asturianu mediu ye asina?
Esbilla
del.icio.us
gustei de ler issu y tal puodu dezir q miranda tamien ye ua naçon cultural y que mirandeses mediud hai lus als muntones ! al mas deilles an miranda !
Por favor, pa esponer les tos opiniones nun necesites faltar a Andecha Astur colo de "andeches" o mesmamete a FAI poniendolo tamien en plural.
Gracies
P.D l'asturianu mediu tampoco entra a lleete.
ye un fechu qu'hai dos andeches ¿non? AA y AN... una ye esata http://www.andecha.org/ y otra esta http://www.andechaastur.org/ Yo nun m'invento nada...
Eso de unidá ye un cuentu chinu, a quien se-y ocurre facer un partíu nacionalista n´Asturies pa ir contra el PAS cuando el nacionalismu asturianu nun ta ni na Xunta Xeneral, tovia podiemos planteanos eso de facer nuevos partíos si hubiere un gran númberu de votantes nacionalistes, el nacionalismu asturianu ye´l PAS y Andecha y nun caben mas.
como si eso fuese nacionalista manifestandose por cuba, por palestina...¿cuándo se manifestaron por Asturies o los derechos? ya los visteis en piloña lo asturianistes que son, cola feria d'abril..
El PAS ta bien como idea... a min gústame la idea que representa'l PAS... Pero tendría que tener dos coses pa que seya potable:
1- xirar un poquiñín a la Esquierda (Un PSOE a l'asturiana, non un PP)
2- Desfacese de Xuan Xosé & Marqués. Yo pienso que los que votaron al caballu pequeñu nestes eleiciones foi porque tarrecíemos ver a esos dos dinosaurios ehí.
El PAS, va tiempu que lo dixi, nun asumió les sos responsabilidaes. Anguaño nun esiste, tien más votos qu'UNA y AA (MAF) xuntes y en cuenta de facer d'oposición como 4u partíu d'Asturies que ye calla y calla y nun sal nunca na prensa nin fai nada...
El PAS como idea ye bona, ta bien... pero falla en trabayu, falla en dirixentes (qu'hai que los renovar) y quiciabes tendría que xirar un pocoñín a la esquierda... Yo nun voté PAS por eso, porque Marqués nun m'inspira confianza y porque en cuenta de ser el proyeutu que tendría que ser - o que dicen ser - son el proyeutu personal d'una persona.
No que dices d'AA yo nun lo veo nin siquier un partíu... AA son un grupu de xente incapaz de llegar a alcuerdos
¿O va dicime daquién que ideolóxicamente ente'l proyeutu AA-MAF y el proyeutu UNA hai un cachu tan grande que ye imposible axuntalos?
Ye lo que digo, si UNA ta bien ideolóxicamente pa la xente del royu, pero ye un error no que ye averase al asturianu mediu entós AA ye lo mesmo al cuadráu, más desaveráu tovía, y eso vese na trayeutoria d'AA que nun pasó (nin va pasar nunca) d'esi techu que tien y yá perdió.
¿Nun taríes más agusto nel PP con Humberto y tal?
¿qué ye eso de "necesitamos un PSOE asturianu"?
¿con caliao, regasificadores, incineradores y molinos d'aire?
¿españolista?
¿que discrimine a la muyer?
¿qu'oprima a la clas obrera?
¿el neolliberal?
¿el de la enseñanza concertada y combayando constantemente cola ilesia?
¿l'únicu, el clásicu, el de siempre, el del logo inconfundible, el de la cadena ser?
brrrrr...
non coño, que venda un mensaxe mui vagu, mui xeneralista... QUe nun se defina a sigo mesmo como "alternativa", que nun vaiga diciendo que ye "d'esquierdes" al altu la lleva, que nun diga que ye anticapitalista (más bien alter-capitalista)
Que fale d'estáu del bientar, de drechos... Refiérome a copiá-y la estratexa de discuru-márketing... Llueu falar de drechos y tal...
Quiero dicir, nun se trata de dicir "Independencia y socialismu" "Nación asturiana, antilliberalismu" etc... Son pallabres qu'espanten, yo lo que digo ye un partíu interclasista, xeneralista, socialdemócrata.. que nin quiera imitar a Chávez nin a Bush, que lluche pol bientar, la igualdá d'oportunidaes y que defenda un sistema económicu capitalista-mixtu.
Vamos, nuna pallabra "nun espantar a la xente".
Ah. Agora ta muncho más, nun sé, "ñidio".
Entós tu y yo enxamás vamos tar nel mesmu partíu...desgraciadamente.
Lo que fai falta n'Asturies ye que se cree un partíu que seya'l referente de la esquierda (real, non del PSOE) en clave asturiana namás.
Los de centru (esa manera políticamente correcta de llamar a la derecha) al entrismu nel PSOE o nel PP.
Pd: a ver cuándo t'enteres de que la oficialidá como reivindicación de partíu "spanta la xente".
Ún pue ser d'esquierdes ensin necesidá de facer d'ello una seña d'identidá, una bandera o andar glayando al altu la lleva...
A la xente - por desgracia - nun la ganen les idees, sinón les formes (mira qué de xente votó PSOE por cómo'l PP usaba'l terrorismu), yo pienso que nel ideariu ún pue ser independentista si-y da pola gana (¿O qué pienses, que nun referendum yo votaba non a la independencia?), pero si pretenets qu'el pueblu te vote, tienes qu'averate un pocoñín a él.
La oficialidá nun espanta, espanta la obligatoriedá... Por eso agora'l movimientu cívicu (CAO fundamentalmente) fala tanto de drechos civiles, de drechos humanos, de que la obligatoriedá nun ye namái que pa l'alministración etc, etc... Refiérome a eso.
Por supuesto qu'a la xente ganaríemosla coles formes...pero ufriendo un discursu alternativu, non más de lo mesmo.
Si la to estratexa pasa por caltener un discursu "PSOE" onde namás camude la posición respecto a la oficialidá creo que tas mui enquivocáu...porque pa eso yá ta n'efecto'l PSOE y mui poca xente cambia de votu pola so postura col asturianu.
Vuelvo repetite que la situación anguaño ye mui fastidiada, con una IU en descomposición, claramente, y onde l'asturianismu-nacionalismu d'izquierda (l'únicu qu'hai, por cierto) tien que tar mui atentu pa consiguir ocupar esi espaciu políticu a la esquierda clara del PSOE...onde haya dende independentistes a federalistes y dende ecosocialistes hasta comunistes.
El centru democráticu (la derecha, vamos, por mui independentista que fueres tu nun referéndum) tendréis qu'escoyer ente entrar nesa izquierda tapando les narices o xugar al entrismu sociata-peperu.
Creo yo, vamos.
YO nun digo qu'heba qu'asumir el discursu del PSOE, pero hai que dir a esos "llugares comunes" de la xente...
Eses pallabres nes que l'asturianu mediu (y el friqui-asturianista) mos identificamos, democracia, llibertá, estáu del bientar y sí, anque duela: España.
Ye más fácil plantegar "Otra España" que "La fin d'España", tien muncha más aceutación na xente.
Hai qu'aprovechar los errores del PSOE, los munchos errores que fai y que tu apuntes: Regasificadores, torretes elléutriques y demás... y diferenciase neso.
Pero la xente yá nun quier ideoloxía, quier soluciones, hai qu'ufiertar soluciones propies a la crisis "Una solución asturiana a la crisis", soluciones propies a los problemes que se planteguen... Quiero dicir, al PSOE-PP copiá-yos les formes, dir a llugares comunes y llueu ufiertar soluciones.
Soluciones que bien puen ser nacionalistes, pero que nun precisen de qu'ún vaiga vociándolo al altu la lleva. Por exemplu, el cambiu de nome de "UNIDÁ" a "UNIDÁ NACIONALISTA ASTURIANA", y el que la propia páx d'Unidá agora meta'l nome completu paezme un fallu. Deberíen d'intentar facer política nacionalista ensin que se notare que ye nacionalista, porque hai que se decatar d'una cosa: L'axenda tán marcándola ellos (los asturianos medios) y ellos son los que ponen nel periódicu o na política (Y sobre manera nel votu) lo que son les coses que más-yos preocupen... Pero por exemplu, cambiar U por UNA foi un actu de "reafirmación del ghetto" que nun val de nada políticamente. (Namás que'l PSOE tien una maquinaria mediática que permite que xente que nun s'identifica en nada cola O o cola E pueda votalos, UNA nun tien esa maquinaria y el cambeu foi un erru)
El problema, quiciabes, ye qu'al asturianismu preocúpalu más la identidá y l'afirmase qu'ufir soluciones, porque si te dicen que pa sacar A, B y C, has renunciar a D, y tu anecies con que non, qu'a D nun renuncies, a la fin nin saques A, nin B, nin C, nin muncho menos D... (eso ye lo que-y pasa a AA, que trabayaron como burros pero nun cedieron nin un res a esi asturianu mediu...)
Nun se pueden quemar etapes, y n'Asturies quemamos munches: El rexonalismu gallegu o catalán (Lliga) foron dominantes n'otra dómina, n'asturies el rexonalismu del XIX desanicióse nel sieglu XX cola llucha obrera, y agora quiximos pensar o creyer qu'esi rexonalismu caltriare na población y tábemos dispuestos pa pasar al nacionalismu... Y asina mos va: 5% de la población, (que toi por apostar que ye'l 5% más cultu, lletráu y sobre manera viaxáu de toos)