¿Medios o fines?
La entruga yá tien años... ¿Qué importa más? ¿La fin o'l mediu? Hai xente que se(nos) define(definimos) "nacionalista" o "independentista", n'Asturies más bien poca d'estes dos clases, sobre manera de la segunda. Podría dicise que los que se definen como nacionalistes o como independentistes nun formen parte del asturianu mediu del que falé estos díes. Eso ta fora de cualaquier dulda. Sicasí, ¿Qué ye ser nacionalista o independentista na Asturies d'anguaño?
Y solliño bien lo de "l'Asturies d'anguaño". Lo de los fines y los medios ye como definir el PIB pela vía de la ufierta o la de la demanda, paécense muncho y a la fin acaben nel mesmu sitiu, pero'l cálculu de les operaciones ye estremáu y lo que ve la xente tamién. Si definimos al independentista polos fines, definímoslu como una persona que quier una "república asturiana llibre y soberana". Col estáu, l'exércitu, la moneda, la bandera, l'himnu, la seleición esportiva, el so pesu políticu específicu na UE, l'escañu na ONU... etcétera. El nacionalista polos fines diba ser mui asemeyáu, quedría una reconocencia oficial (nun estatutu, nuna constitución) del calter nacional d'asturies, unes seleiciones esportives que xugaren los partíos y en definitiva, unos cuantos fechos más simbólicos qu'otra cosa de la esistencia d'una nación.
Pa dambos, l'afitamientu de la idea "nación" o la creyación del "estáu asturianu" son el fin a llograr, y cualaquier otra política (llingüística, cultural, económica, eleutoral, militar, civil, sindical... etc) subordínase al oxetivu d'afitar esa idea o de facer esi estáu.
Otra manera, el nacionalista y l'independentista pela parte de los medios tien un fin mui estremáu: El fin d'esi nacionalista y esi independentista coincide colos fines que persigue'l conxuntu d'Asturies (los asturianos medios) que ye'l "bientar". Esti nacionalista-independentista, vería nel estáu asturianu namái qu'una ferramienta p'algamar esos fines, o nel desendolcu d'una política nacionalista veríala, non como un fin en sigo mesma, sinón como un mediu p'algamar los oxetivos que busquen los ciudadanos. Pa esti suxetu, la política llingüística ye un mediu de salvar un idioma y de dar drechos (non una manera de promover una llingua propia que mos individualiza y da drechu a ser estáu). La conceición paez asemeyada, igual hasta les polítiques a desendolcar tamién, y l'entendimientu igual pue ser mui grande... Pero hai una diferencia fundamental, qu'esti últimu modelu de nacionalismu-independentismu lléga-y más a la xente.
Nuna sociedá que nun 95% nun tien como fines políticos cimeros "Estáu asturianu, nación asturiana, soberanía asturiana" (fines que sí pue haber en cataluña, por exemplu) y les preocupaciones - les fines - son "Paru, vivienda, trabayu, sanidá, enseñu... diba ser conveniente qu'esi nacionalismu compartiere esos fines y adautare les sos polítiques a esos fines.
Faló na entrada anterior un anónimu de que l'asturianismu tien que crear una alternativa: Sí, una alternativa sí. Un camín alternativu, non una meta alternativa. L'asturianu mediu tien bien claro au quier llegar, pue ser daqué murnio que l'asturianu mediu nun tenga mayor preocupación que les perres, el banduyu y les vacaciones; nun digo que non, pero ye a eso a lo qu'hai qu'empobinar les actuaciones. L'asturianu mediu quier dir d'Uviéu a Xapón, y anguaño pue facer el trayeutu en coche col PP, n'autobús col PSOE, en barcu con IX... Fai falta poner l'avión, l'avión nacionalista, pero poner l'avión nun ye cambiar el destín.
L'asturianu mediu, nesi viaxe, nun va molestase porque esi avión que lu lleva al "trabayu, vivienda, familia", apare na parada de la oficialidá, na de les seleiciones autonómiques, o en cualaquier otra... Hasta-y va paecer prestoso asomar pela ventana y velo. Ye un home mui abiertu l'asturianu mediu... Pero eso pa él nun tienen que ser más qu'escales o adornos, él tien mui claro au quier dir... Pa nós ye importante, pa él non, y si queremos entendenos, si queremos los votos pal nuesu proyeutu, empara d'eso tendremos que facer daqué por esi ciudadanu mediu, nun podemos pretender que l'alternativa a lo que-y ufierten PP, PSOE, IX seya otru viaxe a otru llugar estremáu. L'asturianu mediu nun quier turismu cultural, quier sol y playa... El nuesu retu ye da-y el meyor sol, la meyor playa, y amás meté-y nel paquete dalguna visita cultural...
Esbilla
del.icio.us
nesta reflesión y na anterior, toi dafechamente d'alcuerdu col embaxador
Sigo insistiendo no mesmo: esa manera de pensar qu'amueses ye fondamente reaicionaria, anteponiendo la custión nacional a la custión social, y non abordándoles nel mesmu planu, cuando la independencia política d'Asturies nun ye un fin en si mesmu, sinon una manera d'abordar el cambiu políticu y social d'esti País, ello ye:
como la realidá política, social, cultural, medioambiental etc d'Asturies nun nos gusta queremos la independencia p'articular les fondes reformes qu'hemos facer pa la consecución d'un estáu con xusticia social, en primer llugar, pa consiguir un mundu meyor.
Esi nacionalismu tan interclasista tuyu, esencialón y simplayu, nun aporta nengún elementu que permita constituyir esi polu "alternativu" que quepa nel espaciu políticu asturianu...
...y nun lo aporta porque la xente que pudiere votar a una opción "interclasista" d'esa manera nun esiste n'Asturies, onde nun hai una burguesía "nacionalista" como la del PNV o CiU, y onde l'asturianismu ye d'izquierda -con tolos matices que quieras- nun 90%.
(y dempués estrañámonos de qu'a los independentistes los del PCE nos llamen "burgueses")
El camín qu'ha tomar l'asturianismu/independentismu ye'l de la esquierda amplia y facer como en los sitios onde hai fuerces d'esti tipu: ocupar l'espaciu políticu a la izquierda del PSOE, dende los postulaos más "comunistes" a otros más "tibios" pero siempre a la esquierda del PSOE.
Paez que nagües por un PAS 2.0...pero amiguín, yá nun tamos nesi tiempu.
O eso creo yo, vamos.
Pues sí, nun m'avergoña, naguo por un PAS ensin "Figures&figurantes", más comprometíu cola ecoloxía, colos drechos LGTB y col estáu del bientar, llaicu...
Nun sé, yo considérome d'esquierdes (anque nun me da más si vien daquién a dicime que nun lo soi, pue que nun lo seya)... Lo que de mano digo que nun soi ye comunista, nun creo nuna sociedá ensin clases: creo nuna sociedá onde la pertenencia a una clase nun la dea la familia o les perres, sinón la capacidá y el méritu; y na que hasta les clases más baxes tengan aseguraos unos drechos mínimos... La esquierda mía ye una esquierda que quier xubir el salariu mínimu, que quier poner un salariu máximu (inclusive), que quier amenorgar les hores de trabayu selmanales, defender lo público (pero ensin da-y el llombu a lo privao)... Pero nun creyo na revolución bolivariana, nes banderes bermeyes, na dictadura del proletariáu, nin nuna república comunista p'Asturies o nes propuestes marxistes (otra cosa nel marxismu como sistema d'análisis, que tien la so parte de razón).
Yo pienso como tu no d'incluyir a munchos seutores de la esquierda y del centru (yo defino centru como "xente non-politizao, más que como equidistante d'esquierda y drecha), pero pa min meter un seutor comunista nun ye posible, yo considero al comunismu un dogma (tal y como se plantega nes "Juves" y nos más de los seutores del PCA) y los dogmes véolos enforma negativos pa un proyeutu asturiansita (O de cualaquier otra manera).
Yo creyo que más positivo que debatir sobre les etiquetes si somos comunistes, trostkistes, llibertarios,socialdemócrates,socialistes... ye muncho más fácil sentase a falar de los programes y les polítiques concretes. "Fets, no paraules" que dicíen de la que votaron a Montilla.
Por exemplu, pa que veas un poco lo lliberal-socialista que soi: Pa min féxose bien lliberalizando les compañíes telefóniques, creyo qu'agora hai más ufierta y págase menos: pero féxose mal privatizando AENA (¿QUé competitividá quies facer ehí, si ye un serviciu públicu?) o nes concertaciones d'escueles y hospitales (Que lo único que fan ye meter un intermediariu no que ye un serviciu públicu que nun val más que pa sacar perres, y amás nocasiones meter l'ideariu de la ilesia...) Pa min el referente sedría'l Partíu Radical-Socialista francés... Llaicidá, educación y sanidá pública, propiedá privada, drechos de los trabayadores... vamos, lo que ye un estáu del bientar furrulando bien.
Diz l'otru qu'hai qu'ocupar tol espaciu a la izquierda del PSOE... Menuda mentalidá de perdedor y de "outsider" pelos sieglos de los sieglos. El nacionalismu asturianu si tien una mínima ambición tendrá qu'ocupar l'espaciu a la izquierda del PSOE y sobremanera EL PROPIU ESPACIU DEL PSOE, que ye lo que nos dexará dacuando ganar unes elecciones. Lo otros son purismos de "guai" que nun lleven más qu'a la marxinalidá.
Madre mía...véote un poco acomplexáu, Embaxador. Esos postulaos que tas defendiendo nin siquiera los defende anguaño "p'afuera" nin les Juventudes Socialistas -otra cosa ye que na práctica...-. Esi "hasta" dame "hasta miéu".
Vamos ver, reconozcámoslo: tu plantegues una opción de "partíu pola oficialidá" y poco más. Dalgo que nun s'estreme de PPSOE pero qu'apoye l'idioma. Bien, ye una opción, pero pa eso yo considero que ye más fácil l'entrismu nesos mesmos partíos pa trabayar dende dientro...y hai xente que lo ta y tuvo faciendo con pocu éxitu pero llabor encomiable.
Pero plantegar qu'agora alguien va votar a un PAS -que nin siquiera se llame asina- como partíu pola "oficialidá" (con maquillax LGBT pa tresnar el rollu neocon que te presta) ye bastante inxenuo. La sociedá ta fondamente polarizada ente PPSOE y, o s'ufre una alternativa que recueya'l votu a la esquierda del PSOE (nin qu'eso fuere'l maoísmu, rediós!) o poco hai que facer.
Evidentemente, viendo'l rumbu que lleva nel tema social el PSOE n'Asturies fácil diba ser que cayeren muuuuuuunchos votos del PSOE, qu'Asturies, anque sociata, sigui siendo mayoritariamente d'izquierda y tolos asturianos y asturianes tienen un pasáu de tradición obrera.
Repítote que nesti país nun hai una burguesía nacionalista nin va habela. A mi abúltame que los nacionalistes decimonónicos al to estilu va tocavos tapar les narices y votar esquierda (amplia, de mínimos...pero esquierda).
Porque onde hai una esquierda con concencia nacional nun esiste IU, y esi ye'l primer pasu pa entrar nes instituciones asturianes y de conceyos.
Porque onde hai una esquierda con concencia nacional nun esiste IU, y esi ye'l primer pasu pa entrar nes instituciones asturianes y de conceyos. ----> En cataluña hai les dos.
Yo nun me tengo que tapar les narices por votar UNA o daqué asemeyao, yá dixi qqu'a min el programa d'UNA gústame al 100% o si acasu al 95%. Los nacionalistes decimonónicos como tu me llames igual somos pocos, nun te digo que non, yo dicíate de facer un proyeutu qu'atropare votos de xente que votó PSOE...
Como dixo l'anterior, ye'l propiu espaciu del PSOE el qu'hai que consiguir... Y nun ye un partíu pola oficialidá, ye más un PSC lo que veo guapo, que fala de cuestiones sociales, pero tamién de coses nacionales, y sobre manera, que da soluciones nacionalistes a problemes universales.
El Paru, la emigración (de mozos asturianos), la vivienda, la economía... son problemes universales, trátase de da-yos soluciones propies, asturianes. Nun se trata de "votar nacionalista" sinón de "pensar nacionalista", nun se trata de dicir al altu la lleva que yes nacionalista, sinón d'actuar como tal.
Critiques al PAS, pero'l PAS foi l'únicu partíu asturiansita que sacó escañu... ¿Por qué fundió'l PAS? Por munches coses, coxuntura, etc, etc... Yo apunto dos: Averase al PP en más coses que no cultural, cuando asturies ye del PSOE; y nun renovar a Xuan Xosé.
Yo, que tengo padres que per bien de tiempu votaron al PSOE (por fortuna yá non) alcuérdome que cuando yera un guah.e de 10 años o asina, de ver na tele un debate na Xunta Xeneral y entrugué-y a mio ma por aquel paisanu, que de qué partíu yera... Alcuérdome mui bien de la respuesta: "Dicía que yera asturianista, pero paez qu'a lo último del PP..." (Yera na segunda llexislatura) Esa ye la perceición que tenía la xente del PAS y foi por eso que nun siguió.
Un PAS ye lo único que-y val a Asturies, el PAS de la 1ª llexislatura, o'l PAS que foi quien a repitir escañu y cásique sacar un segundu... (Non el PAS dexeneráu qu'hebo depués). Yo digo que pa min l'espaciu asítiase ente IU y PSOE, pañar los votos de la corriente "valledorina" d'IU (la de xente como Rivi paezme imposible por mui a la esquierda que t'eches) y del propiu PSOE...
De toes maneres, si queremos facer un proyeutu pa una Nación, tendríemos que facer que la xente s'identificare col proyeutu nacional. Igual agora ye'l tiempu d'un PAS como'l que digo, y más alantre, en medrando, seya'l tiempu d'una ERC y una CiU...
Yo nun creo que l'embaxador tea falando d'un partíu como'l PPSOE, sinón de daqué MUI estremao. Fala d'un partíu de centru qu'axunte a gran parte de la población porque:
- Tea arguyosu d'Asturies y de la so hestoria.
- Puxe por tolo asturiano: cultura, llingua, vezos, etc.
- Crea qu'Asturies ye una vieya nación europea.
- Seya ecoloxista y nun tea domináu por especuladores y constructores.
- Tea afitáu económicamente na sociedá moderno.
- Seya DAFECHAMENTE demócrata dende dientro.
- Tea polos derechos y les llibertaes DAVERES.
Nenguna d'eses coses les cumple'l PPSOE. Y eso ye mui distinto a un "partíu pola oficialidá".
Ehí ye dafechamente aú m'alcontraría yo más cómodu como votante: soi un ciudadanu de centru, nun soi comunista, toi pola defensa de la cultura d'Asturies, creo nel estáu pero tamién nel mercáu.
Nun soi separatista, sentiríame bien cómodu nun estáu federal que respetare la diversidá de tolos pueblos d'esi estáu. Y taría tamién abondo más cómodu con un PAS que cumpliere toos estos finxos que con partíos comunistes, por eso enxamás los voté nin los voi votar.
En toles naciones con partíos nacionaliegos gobernando dende siempre, esos partíos tienen esti xeitu de centru. Pa la mio desgracia (y la d'unes cuantes decenes de miles de votantes col mesmu perfil) dende la UNA y el meyor momentu'l PAS (Coalición Asturiana) nun hai un partíu asemeyáu a eso n'Asturies.
Y asina mos va. Polo demás, mui d'alcuerdu col embaxador.
Estudiar y pescudar la sociedá asturiana real y de tolos díes. Estudiar y pescudar la evolución, penetración social, resultaos electorales, etc. de les formaciones nacionalites/asturianistes a lo llargo de los últimos 30 años. Estudiar y pescudar la situación actual d'estes foramciones y qué proyectos puen realmente echar raíces y algamar resultaos na Asturies de güei. Namás qu'al traviés del conocimientu y el pragmatismu políticu se pue llegar a dalgún sitiu. Pesllase en discusiones teóriques, en dogmatismos ideolóxicos, facer propuestes d'espaldes a a sociedá que teóricamente ye la destinataria lleva a la soledá y a la marxinalidá.
Y la entruga, Xanu, mía, pa la que nun tengo respuesta ye: ¿Qué podemos hacer les persones que pensamos como tu y como yo na política actual, con unos partíos asturianistes na marxinalidá y el PAS controláu por esi egu tan grande que ye Xuan Xosé y que nun se supo retirar a tiempu?
Entruga revesosa. Yo tampoco nun tengo rempuesta segura. Quiciabes tar ehí y poner empeñu en non distancianos de la sociedá asturiana más concienciada. Esa sociedá que manda a los rapacinos a clase de llingua, que participa de la cultura de nuestro y que s'esmolez pol devenir d'esta tierra y, que (ehí ta'l meollu del problema) nun se siente representada políticamente por naide, llastimosamente y por desgracia.