Agora hai un poco de debate cola tema del referendu p'aprebar l'estatutu-ordenanza de conceyu d'autonomía. En verdá, tien sentíu votar l'estatutu de la que se fai, pero a estes altures ye dalgo absurdo. Esplícome: Daquella nun había manera de saber qué pensaba la xente del modelu autonómicu, si-y gustaba si ye lo que queríen etc... Yera una manera de dirixir a los políticos y d'amosa-yos cuál ye'l camín pel que quier dir la sociedá.

El referendu como figura xurídica (y política) tien xacíu en decisiones d'especial trescendencia, que cambien en muncho l'estatus xurídicu o políticu d'una comunidá: Nun hebo referendu na constitución pa permitir el votu d'estranxeros comunitarios; pero habríalu pa decidir la forma del estáu o les funciones de los poderes o los drechos y deberes. Otra manera, el referendu úsase davezu en decisiones mui controvertíes, inesperaes, o que precisen d'un sofitu ampliu na población como manera de resolver una crisis: La crisis d'identidá del PSOE cola tema de la OTAN foi un exemplu claru d'esto.

N'Asturies, l'estatutu que proponen agora PP y PSOE (y mieu me da qu'IX s'ameste al comboi) nin ye la solución a una crisis política (PP y PSOE tán d'alcuerdu y con ellos l'80% y picu de la sociedá), nin ye una reforma d'especial trescendencia. ¿Dannos drechos? ¿Impónennos obligaciones? ¿Cambien el marcu de coesistencia (pa min ensin oficialidá nun hai convivencia) que ye l'estatutu? ¿Hai cambeos fondos na situación social o política d'Asturies col nuevu estatutu? La respuesta ye non. Ye tan absurdo votar esti estatutu como votar una llei pa regular los parquímetros...

Otra cosa ye que dende les conceiciones d'ún, la democracia participativa seya'l modelu y ún defenda'l referendu en too porque ye esi'l modelu de sociedá que considera exemplar. Yo por desgracia, pienso qu'ensin cultura política nun hai democracia participativa que facer, qu'eso namái que yera posible nuna polis de xente lletrao, ocioso y sabio; pero imposible nel país que ve "Escenas de Matrimonio" (mencionó la serie Pablo Texón l'otru día nel blogue d'él, y agora vila na TV, y plasmé de la puxarra que faen), que pierde'l xacíu cola eurocopa y que vota a los políticos que vota.

Asturies, nun universu ideal y paralelu, tendría que tar votando masivamente un estatutu con drechos (non sólo la oficialidá), col estatutu de nacionalidá p'Asturies (que ye lo que somos, nun somos nación política, pero sí una nacionalidá cultural), con deberes, con un nuevu marcu competencial... Pero nun tamos nun mundu paralelu, y a min paezme que nes circunstancies actuales pidir un refrendun ye como pidilu daquella que reformaron la constitución pa poner lo del votu d'estranxeros: Un absurdu.

Pero bono, si AA y demás xente d'esquierda (cónstame que tamién n'UNA hai xente que ta pol llabor) quier facer d'eso la bandera política... Otra vuelta que desconeuten cola xente d'Asturies no que quier, y que nun saben valorar - a lo menos yo véolo asina - la figura d'un referendu que ye pa lo que ye: Pa da-y solemnidá a los grandes actos políticos, pa resolver crisis y p'asentar marcos xurídicos estables. N'Asturies, anguaño, nun se cumple nengún d'esos requisitos...

Y defender na sociedá del PPSOE una democracia participativa, abierta, con presupuestos participativos, conceyos abiertos, participación ciudadana hasta na sopa... ye como na gran película La Vida de Brian, pidir el drechu de los homes a parir... ¿Qué mos soluciona un referendu y qué mos soluciona la conceición política que lleven arreyada los que lo defenden anguaño? N'Asturies hai qu'atacar no cultural: Valtar la cultura política d'Hunosa y Muface, de sovención y comederu, de súbditos a los que-y dan la comida fecha, y facela de xente emprendedora, non namái que no económico, sinón tamién no político y no social... Namái que con persones independientes, que piensen y actúen por sigo mesmes, va ser posible algamar la cultura política que valga de base al modelu que defende la esquierda nacionalista (AA, UNA) y española (IX) n'Asturies.