Les series de TV (les películes tamién, pero más les series) tienen muncha importancia na cultura d'anguaño. Nun sé si daquién estudió esi fenómenu sociolóxicu, pero'l referente o referentes qu'asitien tienen muncha importancia. ¿Cuántes veces sentistis a daquién dicir que tal o cual persona "come como Homer", "ye tan borde como House", "tan basta como Aída"... etcétera. 

Nel institutu y na escuela, los guah.es imiten les frases propies d'estos personaxes, repítenles y ríense. Na edá adulta, dacuando les repiten, pero munches veces vienen na conversación escenes o "gags" d'eses series, como momentos comunes d'un imaxinariu coleutivu. Una de les coses que más me llamó l'atención de la importancia que tienen les series, foi una vegada, va tiempu, de la qu'escoyí carrera (o al poco d'escoyela) entré nun foru de xente que falaba de qué carrera diba facer y un poco d'universidaes, precios d'alquileres y tal.... Una moza dicía que taba farta de la xente, qu'ella llevaba queriendo facer criminoloxía dende cuantayá, y qu'agora nun sabía si-y diba abastar la nota, porque diz que desque punxeron CSI el númberu de xente que quería facer la carrera aumentó d'una forma descomanada...

Yá sé que nun hai nenguna serie d'un home o muyer qu'estudió ADE... pero la perceición social que da una serie d'un personaxe con una profesión, ayuda a ún a decidir qué quier ser na vida, ayúdalu a descubrir coses o factores d'una profesión, etcétera.

Pienso que los poderes públicos deberíen tamién regluar les series de producción propia de les cadenes públiques (les privaes que faigan lo que-yso dea pola gana) y les series non propies que s'emitieren tuvieren que comprobar qué valores tresmiten... 

Aída, Siete Vidas, Aquí no hay quien viva, Periodistas, Compañeros, Hostal Royal Manzanares, aquella de xente que baillaba nuna escuela, Los hombres de Paco... Hai dos coses mui importantes y comunes d'estes dos series: Primera: Toes, absolutamente toes ensin esceición, ambiéntense en MADRID. Segunda: Nenguna, absolutamente nenguna, tien l'ámbetu rural como escenariu. Y non sólo eso, sinón que les poques referencies o tratamientos a esti ámbetu son despeutives.

La verdá, na TVE, facer una serie ambientada nun pueblu d'Asturies diba ser absurdo (porque entós tendría que ser n'Asturianu)... Pero, ¿Nun habrá pueblos en Cantabria, Castiella, Andalucía, la propia comunidá de Madrid, Murcia, Aragón... que falen castellanu y qu'amuesen una perspeutiva rural? Paezme que Los Mundos de Yuppi taba nun pueblu, véolo borroso agora... Nun sé, ye verdá qu'hai poca xente que vive n'ámbetos rurales. Paezme que'l 80% de la población d'España ye urbano... Si españa tien 45M de persones, eso quier dicir que tenemos 9M de xente que viven nun pueblu, n'Asturies más d'1/4 de Millón. Si vemos qu'en Madrid viven 6M de persones... ¿Por qué tantísimes series ambientaes en Madrid y nenguna, absolutamente nenguna, nun ámbetu rural? Cuestión de númberos yá vemos que nun ye. Namás qu'el 13% de los españoles vive en Madrid, y el 100% de les series ambiéntense ende... Da qué pensar.

¿Nun sedrá que mos tán tresmitiendo un modelu de lo que ye correuto? ¿De lo que ye normal? A la xente nun-y estraña que pase esto, venlo normal, sobre manera en Madrid onde tiene una mentalidá de que Madrid ye la "Nova Roma" y lo demás son "provincies" (nun ye coña, sentí-y a xente afincao en Madrid falar de lo demás como "en provincias"). Pero vaya, qué cosa, resulta que fui al Reinu Xuníu esti veranu y ellí ambientaben una serie en Londres, otra en Manchester, otra nun pueblu del norte d'Inglaterra... Vamos, lo que ye una TV que busca ser un reflexu del pueblu al que sirve o que tien que vela...

(Mesmo que TeleAreces, coles sos 23,30 hores de castellanu al día, y les películes del oeste y series americanes males, ensin siquiera les sotitular/doblar al asturianu)...

Naide apara nello, pero nun ye normal qu'un mozu de Collada, Cuartu de los Valles, Tinéu; que namái que fala asturianu les 24h del día, que anda col tractor y que cuida de les vaques, tenga que se referenciar na serie d'Aída, o tenga que sentir les noticies en castellanu... Ye tan ridículo, como si agora fixéremos que toles series que ven los guah.es de Madrid tuvieren ambientaes en Grau, falaren n'asturianu los personaxes y diéren-yos les noticies tamién n'Asturianu. Pero vamos, yá sabemos qu'en esti país tan guapu llamáu españa, les coses nunca, nunca, nunca son de doble direición. Lo que val pa ellos, tien que valir pa nós; lo que val pa nós, nun pue valir pa ellos... Ye lo que se llama colonialidá, una minoría (13% d'España) impón o "difunde" los sos "espacios comunes", el so mou de vida, les sos problemátiques, los sos debates, a una mayoría silenciosa que nun ve reflexao esi tratamientu pa colo que ye d'ella. Ye l'asimetría, la mesma asimetría llingüística que fai qu'anque l'asturianu fore oficial, nós tuviéremos la obligación de conocer otra llingua que nun ye la de nueso (el castellanu) y el madrileñu nun la tuviera.

 La asimetría llingüística, ye tamién una asimetría cultural, de poder, de idees, de fuercies, de modelos... El problema ye, que'l modelu que tenemos, mesmo'l llingüísticu que'l cultural, ye'l que nós como pueblu refredamos día sí día tamién. Paez que mos presta más una serie ambientada n'Esperanza Sur, Comunidá de Madrid; Desengaño 21, ciudá de Madrid; qu'una en Ventanielles, Vallobín, Pumarín, San Cloyo, Natahoyo, La Calzada o qu'una na Plaza'l Güevu de La Villa... ¿Ye más "cool" vivir en Vallekas (sí con K) qu'en Ventanielles? ¿"Mola más" llimpiar escaleres como aída que ser xateru? ¿Ye más guai ser profesor de matemátiques nun barriu de madrid pa que te faigan una serie, que maestru d'Asturianu en Mieres? Paez que sí, y paez que mos gusta...