Asturies, capital Uviéu
Esta fin de selmana, aprovechando unes circunstancies personales, averéme a Xixón y vi la Llaboral (un edificiu perguapu, encamiéntovos dir) y enteréme de qu'Areces (Presidencia del Principáu), tien un despachu ende...
Y ye que güei lleo na prensa que Gabino vuelve a dar caña cola tema la capitalidá, y qué queréis que vos diga. Tien más razón qu'un santu. Nun pue ser que n'ASturies tea faciéndose la política que se ta faciendo. Ye la política del "Puta Oviedo, Puta Gijón". Un paletismu de lo más provincianu (vamos, ye'l PSOE, más provinciana que la FSA.... poques coses hai).
¿Imaxínase daquén que ZP tuviere un despachu de Presidente del Gobiernu en Llión, porque ye él d'ellí? ¿O que Aznar lu tuviere en Valladolid? Ye cenciellamente impresentable. Como poner la Procuradoría Xeneral en Mieres, o la TPA en Xixón. Una cosa son museos, atraiciones turístiques, centros culturales... que ye daqué debatible y otra cosa son les instituciones y les instalaciones propies del país, como la RTPA, la procuradoría xeneral o el despachu de presidencia. Si a Areces nun-y gusta Uviéu, nun quier vivir ellí o nun quier treslladase tolos díes porque-y da galbana, que quede en casa y que se dedique a ser alcalde de Xixón y dexe pasu a otra persona.
Ye llamentable lo que pasa n'ASturies. Nun conozo otra comunidá autónoma nin otru país nel que pase, sacantes otros países que tienen dos capitales o trés, como Sudáfrica, por exemplu. La capital ye la capital, y yelo non por sortéu o caprichu, sinón por unes circunstancies históriques. Naide nun ve mal que Xixón seya la capital de la cultura asturiana cola Arribada y coses d'eses, yo mesmu digo que na defensa de la llingua Xixón lléva-y muncho a Uviéu y el compromisu ende ye mayor, nos particulares y nel gobiernu llocal. Pero otra cosa mui estremada ye poner una capital nuna ciudá que nun-y correspuende d'una manera en nada abierta. Ye como digo la política del "Puta Oviedo", la del paletu del fútbol que nun-y presta la otra ciudá y que fai d'eso política. Uviéu ye la capital d'ASturies, foilo na edá media, foilo cola diputación, col 34... Y Xixón namái que lo foi 2 meses, nuna guerra, cuando Uviéu taba tomada pol enemigu. Y yo nun sé si p'Areces Gabino sedrá un enemigu, qu'igual sí, pero cuido qu'Uviéu nun ta tomada por nengún enemigu estremáu del que ta nel restu d'Asturies. Nun hai cañones, nin guerra, nin nada que xustifique'l treslláu de la capital.
Lo dicho, que si Gabino convoca una mani pola capitalidá. Ehí taremos los carbayones. :-)
Esbilla
del.icio.us
Qu'Uviéu seya la "capi"...val, acéutolo. Por sides hestóriques como tú dices y tal...Pero tamién por sides práutiques y "económiques", ye más cenciello aconceyar tolos representantes nun mesmu sitiu, arriende de que les comunicaciones danse meyor en llugares planos -como l'encefalograma Gabino-. Magüer, lo que tampoco pue almitise ye'l centralismu que fai qu'unos tean más importancia qu'otros simplesmente pol fechu de vivir nun sitiu o n'otru. Y nun digo importancia nel sen de la relevancia económico o político, digo importancia enchipiada. Tamién anatia foi Belonciu la capital...Y fundóse Xixón enantes de ñacer Uviéu...¿Y? Otros países tienin 3 capitales...¿Y? Asturies podría haber Belonciu como capital hestórica, Uviéu por capital política y Xixón como capital económica o cultaral como despaladines. ¿Y sicasí, ye malo que los noyos poblacionales tean el drechu de dicidir y opinar independientemente de lo qu'otros dicidan por ellos pa coles coses de so? Ensin dir más llueñe tú mesmo dixesti en Xixón que la ciodá nun te prestaba un migayu...Pos a min sí, y Uviéu tamién...Nun digas entós que yes ayenu al Puta Oviedo/Puta Gijón...¿Habemos d'almitir qu'una ciodá que nun mos tenga apreciu, "amor" y bona consonancia dicte'l cómo facer les nueses coses?
Francamente, que'l bastón de mandu lu tean les ciodaes...ye murnio. La Xunta Central ta n'Asturies, onde-y correspuende, como si ye n'Uviéu o no altu Peña Ronda...
Uviéu ye la capital, tolos países tienen capital y Asturies nun ye esceición. Otra cosa ye que por ser capital vaiga tener un tratu que nun-y correspuenda. Efeutivamente, por ser capital nun merez nin más perres, nin meyor tratu, nin más museos, nin nada d'eso...
A min gústame más Uviéu estéticamente como ciudá-arquiteutura, y gústame más Xixón no que ye la defensa y el compromisu cola llingua (N'Uviéu hai muncha tontería y pijeríu que nun me presta nada) pero esto ye dalgo suxetivo, nun son razones oxetives pa poner o non la capitalidá nuna ciudá o n'otra.
Toles ciudaes tienen coses qu'otres nun tienen. Quitá-y la capitalidá a Uviéu ye como quitá-y el mar a Xixón. Xixón nació y vivió años como una ciudá industrial, un polu de desendolcu, un puertu... Uviéu de poco depués de ser fundada vivió y dio en ser capital, quitá-y la capitalidá ye quitá-y la hestoria y ye un robu al padrimoniu de la ciudá.
Con too, nun toi en nada d'alcuerdu con tratos de preferencia, como señales.