Predicar en tierra d'infieles....
Al traviés del blogue de Carlos X. Blanco atopé l'artículu de Pelayo Rojo en Glayíu y en castellán, onde diz "...lluevan chuzos, supuestamente de un “fuego amigo”: a) por escribir en un registro del asturiano no aceptado por todos, b) por hacerlo en español, como si no hubiera que “predicar en tierra de infieles” y dar a conocer estos temas en sectores mucho más amplios de la sociedad asturiana...".
Nun-y falta razón a quien lo diz. Dacuando ye importante dar a conocer les idees d'ún, y dar a conocer la nuesa versión al restu de la sociedá. Yo en Madrid, dende qu'aporté, nun aparo de contar la represión llingüística que carez asturies y el réxime d'esceición nel que vivimos. Poro, ye preciso establecer calces pa comunicar y esparder una versión, que ye la nuestra y amás, ye la verdá... pues los que mienten por interés, los que confunden cola terminoloxía y lluchen por tapecer el problema nun somos nós.
Lleía va unes hores en Foreign Policy un artículu mui interesante que falaba del cyberactivismu de los rusos, de los ciudadanos rusos na guerra d'Osetia y Abyasia... (Más información equí: http://www.fp-es.org/el-ejercito-virtual-del-kremlin) Destaca la importancia del usu del inglés, del usu continuo de comentarios hasta nos foros del Warcraft... Daqué asemeyao tendríemos que facer día sí y día tamién los asturianistes.
Lleo n'otru sitiu, y lleo tantos blogues y tantes coses que nun sé nin a quién lo lleí nin ónde (namái que me quedé cola idea) de que la situación d'ASturies ye que namái hai un núcleu de población, unos 30.000, el 3% que falen o falamos l'estándar y que han articular el movimientu de vindicación llingüística, ser los homes-altavoces de la campaña, ser el vehículu de les idees y, si ye preciso, usar otros idiomes y rexistros y foros pa esparder les idees... (Cosa que nun ye difícil, porque por desgracia d'eses 30.000 mui poques asumieron el compromisu de vivir 100% n'asturianu). Hai qu'iguar daqué, una ofensiva global, basada en puntos comunes d'alcuerdo, más alló del CAO y de doilacara.net, hai que facer un plan, primero de dominar el mundu (coles nueses idees y vindicaciones)
Esbilla
del.icio.us
Hola collaciu: ye verdá qu´hai que predicar en tierra d´infieles. Yá sé que davezu paez un llabor desesperante. Los artículos qu´un garrapiellu mínimu de persones asoleyamos en sitios como Kaosenlared alcuentren xeneralmente una incomprensión descomaná. Que la derecha menos informada siga siendo "Cuadonguista" nun ye d´estrañar por aquello de lo eficaz que tala ideoloxía resulta pa los esencialistes de la nación española y los anti-asturianistes. Pero que gran parte de la esquierda española (madrilana, por ex., que yo conocí un pocu) tenga esa zuna tamién, ye ablucante. Como Kaos ye prestosa ueb que permite comentarios, yo dime cuenta de cómo ta´l patiu mesetariu. Tienen que ser, xeneralmente, comentaristes euskaldunes los que comprenden un pocu la situación "rara" (por dicilo sonce) d´Asturies. N´Asturies, a nun ser IzCa y pocu más, predomina esi rollu "progre-guai-cosmopolitan" sobre´l tema nacional (de la nación ensin estáu) que da noxu. Nuna ueb concreta "roxo-madrilana" me prohibieron directamente sacar artículos míos "asturianistes", como dicíen ellos. En Madril (y yo viví ellí un tiempu, y agora relativamente cerque), lo que sienten ye que fuera d´esa Asturies naif, de casa rural y tópicu ente covadongusta y dinamiteru, nun quieren saber ná, paézmelo a min. Yo toi porque hai que predicar, dar la llata cuanto seya mester. Perdona´l rollu, fíu.
rollu nengún, ye lo qu'hai. Yo muévome notra xeneración, supongo, y na facultá la hestoria esa nun ye la que la xente cree, anque tovía hai dalgún. Pero ye esa la xera que tenemos que facer, concienciar, desplicar y "salir del armariu".
Lo que teníemos que buscar, ye la manera d'atopar un canal que llegue a muncha xente, lo de Kaos pue tar mui bien, porque la xente concienciao d'esquierdes lleelo, pero amás d'eso, pa concienciar al "ciudadanu mediu"... ¿Qué facer?
Cuido que p´abrise hai qu´algamar visibilidá, n´efeuto, y non solo nes uebs "alternatives", sinón en cada espaciu de gran pùblicu au hubiera canales anchos pa llegar. Un piñu de diez o dolce asturianos "famosos" en tol Estáu, nos deportes, las lliteratura, política, relixón, etc., un piñu asina que falara con normalidá del (y en) asturianu, y que falara ensin complexos de la "nación asturiana" podía ser bárbaro, la cuenta pa que madrilanos, andaluces, y demás "españoles medios" se decataren de qu´hai una "identidá" nacional, qu´esiste, que s´asoleya ensin los consabíos complexos. ¿Cual foi´l papelón d´Hevia, Víctor Manuel, Fernando Alonso, etc., nesti sen? Como mínimu, más bien probe. Siempre cola etiqueta esa del "asturianu universal" o l´español-asturianu tipu "patria chica"... Tenía que dase una "conxura" pa salir del armariu, como dices tú. Una conxura d´unos cuantos. Una que diba tener efectu-rebote na propia sociedá asturiana, esa que solo crucia´l cordal pa dir a Benidorm. Les lleendes urbanes sabemos abondo d´"identidaes" y estremancies Asturies/España, pero los aculturizaos de dientro, non. Sabese qu´esiste una "nación tapecía" n´España, diba ser dalgo que rebotare de Payares pa riba, de xuru.
Yá me metisteis el rixu pa intervenir, coime.
1) Buscar puntos d'alcuentru y axuntanza. Hailos. Falla la voluntá o'l
"ego" individual o de cada xermandía.
2) Buscar nueves maneres d'intervenir na sociedá. Afalar la imaxinación. Nun acabar sonando como un discu rayáu.
3) Cuando se plantega daqué novedoso o contracorriente danse voces en castañéu, faise'l quixote y hasta te tomen por pinín. Pero hai que cabruñar nello ya insistir, insistir, insitir.
4) Cuando hai movimientu hai vida. Anguaño hai movimientu ente la xente que defiende Asturies. Surden iniciatives, organizaciones, proyectos. Too eso ye perbono. Siempre que se faigan pa combatir l'enemigu común, ensin pesllar puertes a trabayos n'andecha. Refugando dedicase a esa actividá tan enraigonada ente nosotros de puñanos mutuamente.
Un saludín.
Prestóme, Xanu: "Siempre que se faigan pa combatir l'enemigu común, ensin pesllar puertes a trabayos n'andecha. Refugando dedicase a esa actividá tan enraigonada ente nosotros de puñanos mutuamente." En realidá, los 4 puntos xuntos. Debíemos emprimar campañes colos enemigos reales del fechu nacional asturianu, ensin cayer nunca nel xuegu suciu o´l biloridu barriubaxeru: campeñes aconceyaes qu´amuesen que los d´esti lláu (d´esquierdes o dreches) somos como un solo home. Eso la sociedá diba percibilo, la mocedá diba aparar n´ello y reaccionar, etc. Por exemplo: campañes ontra los "sensatos y pensantes" d´anguaño... La Güestia de la que fala Sanchez-Vicente, que surde de xemes en cuando por La Nueva España....